Zote Toyota Mizoram Premier League Season 10 round 5 zawh fel a ni a, champion lai Chawnpui FC in league table chung ber an luah.
Champion lai Chawnpui FC tan tun season-ah chona a hautak dawn nia ngaihna a lian. Chutihrualin coach tha Lalrindika Hmar hnuaiah bul an tan tha a, player an nei tha.
Aizawl FC lakah hian inveng bik nih an tum lova, first half-ah goal lut lo mahse team pahnihte an hmuhnawm.
Second half-ah Peter Lalrinhlua hmangin Chawnpui in goal an khung a. Minute 82-naah match hmasa lama an chhawr theih loh striker David Lalchhuanawma chuan an goal hnihna a khung ve leh bawk.
Inkhel tawp lam boruak a sang a, Aizawl FC tan R. Ramdinthara chuan minute 97-naah goal a khung ve a ni.
Chawnpui hian round nga an khelh tawh hnuin goal an la chhuah tlem ber a. Tun season-ah tawh an khirh leh dawn tih round nga chhungin an lantir leh mek.
Inkhel hnuhnung zawkah Mizoram Police leh Chanmari FC an inkhel a, 2-2 in an inhnehtawk.
1st Bn. MAP Ground a inkhelah hian Chanmari FC in halftime hma chiah leh a zawh chiahah goal an nei. Police player Lalrinzuala chuan an lamah ti lutin second half tan hnu lawkah Ramngaihsanga chuan an goal hnihna a khung. Mahse Police an ngawi reng bik lo, Lalrothlanga leh Lalthantluanga hmangin minute 61-na leh 67-naah an chhanglet.