Aizawl: Congress party-in nimin khan Lungdai leh Kawnpuiah Tuirial bial Campaign khuhhawnna hmanpuitu, MPCC President Lalsawta chuan kumin MLA inthlanah Congress party aiawha turin Dr Henry Zodinliana a puang.
Campaign hawnna inkhawmah MPCC President Lalsawta chuan sakhaw zalenna kuai thlep tur leh an duh dana kuai her turin BJP chuan regional party-te hmanruaah a hmang nasain a zuam em em tih a sawi a. “Chutiang chu tuna MNF an kalpui dan a ni a, BJP a hnim hnai hreh lo. Sorkar tuma hmanhlel ve party dang pakhat pawh hian BJP an hmutai a. Central BJP sorkar an thlakhlelh chhan chu corrupt an duh vang,” a ti.
Lalsawta chuan Congress erawh an corrupt ve dawn lo tih sawiin, “MLA emaw, minister emaw pawh ni se, Congress sorkarah chuan kan corrupt dawn lo. Eng emaw vangin lo corrupt tum mah se, kei chuan ka dim dawn lo. Mipui chhiah tling khawm sorkar pawisa hmanga ram hruaitu an hausa hi a hmuhsitawm a, ka thikthu a chhe hle ang,” a ti.
Tunah hian ramin harsatna hrang hrang a tawk a. Hetih laia kekawr ipte zena thut mai mai a theih loh tih sawiin Lalsawta chuan, “Sual a chak zawk theihna tura thil pawi tak chu, mi tha te’n engmah an tih duh loh hi a ni. Politics a tha lo ti a, tel ve-na tlakah an ngai lo a nih chuan an ngaihnepte hnuaiah an kun dawn tho a ni,” tiin a sawi.
MPCC President Lalsawta chuan Tuirial biala Congress party aiawha ding tur, Dr. Henry Zodinliana hian Tuirial bial leh Mizoram tan tih theih a nei tih sawiin, “Hausak a tum lo va, mipui rawngbawl a tum a ni. Amah a rintlak angin Congress party-in kum 2023 MLA inthlana kan innghahna chu pawisa ni lovin Pathian a ni,” tiin, Pathian nen chuan Mizoram tan sorkar tha an siam thei a ni tih an hrechiang hle tih a sawi bawk.
He hunah hian MLA hlui, Chalrosanga, GS, MPCC leh Tuirial biala Congress party aiawha ding tur, Dr Zodinliana te pawhin thu an sawi.