ZPM Leader Lalduhoma’n nimin khan ZPM Champhai North Block Party Meet a hmanpuinaah kalphung thar an inzirtir mek laia zu leh sa nena puipunnaa chet vak a rem ve loh thu a sawi.
Champhai Kanan venga PD Sena Memorial Hall-a inkhawmah Lalduhoma chuan ZPM chu an danglam tur a nih thu sawiin, “Puipunnaah mi dangte kalkhawm anga zu nena tih luih luih a rem ve lo. Zu in mi pawhin a hun leh a hmun an hre ve tur a ni. Kalphung thar kan inzirtir mek laia zu leh sa nena puipunnaa rawn chet vak vak hi a rem ve lo. ZPM-te chu kan felfai tur a ni,” a ti.
Lalduhoma chuan tun hnaiah Mizoramah politica-ah harh tharna a thleng nasa tih sawiin, “|halaite an harh a, foreign-a awmte thlengin an ZPM ta vek mai niin a lang hial a ni. Chu bakah nuten ram an vei a, upaten politics an ngaihven mai ni lovin kan zingah min rawn ho thin hi a ropui kan ti,” a ti.
ZPM leader hian ZPM a lo sorkar a nih chuan tar pension hi Rs. 1,000-in an tihpun tur thu a sawi a. Champhai border trade hmalakna muang lutuk chu veiawm a tih thu sawiin, “He mi kawngah hian ZPM chuan hmalak dan tur ruahmanna Champhai bial mipuite tan kan siam a ni,” a ti a. Sorkar tur chuan MLA neih a ngai a, an sorkar lo a nih chuan tuna sawhthing chingho zawng zawngte an beidawn mai dawn avangin ZPM a sorkar theih nana theihtawp chhuah zel turin party mite a chah.
Vawiina sorkar leiba tam tak inchhekkhawl chho mek hi an zirchian hnuah sorkar lai mek leiba chauh ni lovin sorkar hmasa atanga lo inchhekkhawl chho zel a lo ni reng mai tih an hmuchhuak niin Lalduhoma hian a sawi a. “Kan leibat zat hi a cheng zata sawi tur a ni lo va, GSDP atanga za zelah engzat nge ni tih chhut zawk tur a ni. RBI-in a chhut dan hi rin mai tur a ni. Chhiarkawp dik lo zawnga mipuite hrilhfiaha bum tum hi thil dik a ni,” tia sawiin, ZPM a lo sorkar chuan inrenchem an inzirtir dawn tih a sawi bawk.
He hunah hian Champhai South Block ZPM MLA Candidate Clement Lalhmingthanga pawhin thu a sawi.