West Bengal a National Sub-Junior Boys Football Championship khelh zawh taka chak ber Mizoram team chuan Zirtawpni chawhnu khan Mizoram leilung an rawn rap leh ta.
Lengpui Airport ah Mizoram Football Association chuan lo hmuakin Sairang Dinthar a MFA Ground-ah national champion-te lawmna hun buatsaih a ni a. He hunah hian David L Pachuau, Joint Secretary, Sports and Youth Services leh Zonunthari, Deputy Secretary, Sports and Youth Services te an tel.
PC Vanlalhruaia, Sr Vice President, MFA chuan National Sub Junior Boys Championships atana Sports & Youth Services Deptt. in Saidan a an naupangte tirh an phal chu MFA in lawmawm a ti tak zet tih a sawi.
Lawmna inkhawm kaihruaitu Lalruatsanga Tochhawng, MFA Finance Secretary chuan naupangte chu bul tan chauh, hmabak eng tak nei an ni tih hre reng a, tuna an hlawhtlinna chu chapopui leh chhiatpui nana hmang lo turin a chah.
September ni 12 Thawhlehni khan Behrampore Stadium, West Bengal-ah Mizoram sub junior team hian final-ah Manipur chu si thum faia hnehin National Title hi an chang a ni.
Final hmuhnawm ah hian Mizoram tan Lalruatdika, Henry Lalhnehzova leh Isak Lalmalsawma ten goal an khung.
- Kolkata lamah pawh lawmpuina hun hmang
Ningani khan Sub Junior champion Mizoram hi Jacob Lalawmpuia, Joint Resident Commissioner, Kolkata & Staff te chuan lawmpuina hun an hmang.
Champion team Nilaini khan an inkhelhna hmun West Bengal state chhunga Malda, Berhampore atangin Kolkata an thleng a, New Town, Mizoram House ah an thleng.
Lawmna inkhawmah hian Jacob Lalawmpuia chuan Mizoram Team, Official & players te chu a chhuan thu leh Pathian tih chunga an hmalam hunah theihtawp chhuah zel turin a fuih
Team Manager Lalnunsanga chuan tun tum Mizoram Team hian hlawhtling tura an thawhrim thu leh thawh hona tha tak leh Pathian an tih tlatna chu an hlawhtlinna bul ber a nih thu a sawi.
Lalbiakzuala, Asst.Secretary, MFA in MFA aiawhin he hun buatsaihtu JRC & Staff te leh,Welfare hruaitu lo kalkhawmte chungah lawmthu a sawi a, MFA Golden Jubilee Lapel Pin a present hlawm bawk.
JRC & Staff te hian champion team te hi lawmpuina chawhlui an kilpui nghal a ni.