Kar hmasa tawpa ZPM leader Pu Lalduhawma’n Champhaia a thusawi lai chibai tumtu, zurui nia hriat la chhuak tura a mite a hrilh dan chuan sawi zui a hlawh hle a. Pu Duha hian “la bo rawh u” tih duh tawk mai lova, “pawnah dah chhuak rawh u” a tih chu mi tam takin a tawngkam a chhe lutuk deuh ani an ti ani ber a. Amah tantute chuan hetianga Pu Duha’n a thusawi lai lo bawhbuaitu a ngaimawh hi a huaisen a, mi thutak sawi laia zurui lo phe sek hi a tha lo reng ani an ti thung.
Politician te hi mipui hian kawng hrang hrangin kan teh a. Pa chak leh thil ti thei, ti deuh hrek hrawk kan duh rualin mi hriatthiamna ngah mi, mi chi hrang hrang awmdan hrethiam kan duh bawk a. Mahni tan zawng awmdan hi kan sawimawi ani deuh ber rih mai.
Thil lo thleng thuta kan lo dawnsawn dan hian mihring mizia a hril ber mai a. Tunhma khan vawikhat chu journalist kalkhawmah zurui pakhatin Pu Lalthanhawla thusawi chu a lo au buai tawh a. Mahse, Pu Hawla khan, hetiang tih ching hi in tlem tawh khawp alawm le, tunhma ngaihtuah chuan in felfai tawh hle mai kha a ti fiamthu duh chauh mai a. Pu Zoramthanga CM tirh lam khan Aizawl veng pakhata khawlai a tlawh kual lai chu party dang mi zurui chuan, i hmel chhe lutuk tiin a hmaichhanah a lo deuhsawh tawh a. CM security lam an lungawi lo khawp mai. Chief minister a nihna pawh zah lo lutuk tiin man mai an tum a. Mahse Pu Zorama chuan, ka hmel hi a siamtu hian tha ti taka a siam a ni e tiin a security lam a khap ta zawk a. Heng hruaitu pahnih ten rin loh lutuk thil thlenga an dawnsawn dan hi a puitling khawp mai. Mi rilru buai thut thut lem lo, thil a lo thlen phut pawha fim taka thil ngaihtuah an ni tih an tilang chiang khawp mai.
Inthlan kan hnaih tan a. Politics ah tan a na a. Party ten an chakna turin theih tawp an chhuah theuh a. Mizoram kil tin an fang vut vut hlawm a. Mi chi htang hrang pawh an la tawng zel ang. A thenin an lu chunga kut nghata tawngtai ngei an tum ang a. A thenin tawngkam chhe tak takin an lo dawngsawng bawk ang. A nihna takah chuan kan political party te hian zurui pawh hi anmahni lam an nih chuan an hnar phal lo a. Chutiang ang chu Party leh kan society ten kalphunga an lo neih sa a tam mai. Mi chi hrang hranga thil a thawh dan hi a in ang lo hlawm a. Ngaihsan zawng chibai ngei ngei duhte pawh an tam mai. Hetiang karah hian mipuiin kan hruaitu turte hi kan fiah mek ani tih hi hria ila. Eng ang mizia nge tih hi mihringa thil pawimawh ber ani reng a. Mihring hi inthup thin mahila thil beisei loh lo ni thutah hian a lang leh thin. Chuvangin englai pawha kan politician te hian filru fim an put a ngai tihte pawh hre hlawm teh se.