Odisha-a Sundargarh district-ah Pathianni khan rannung seh (scrub typus) natna kai hmuh chhuah mi 11 awm lehin he district-ah hian a kai mi 180 an awm ta tih damdawi in thuneituten an sawi.
Sample 59 endik tura thawn niin heng zinga 11 chuan scrub typhus an lo vei ngei tih hmuh chhuah a nih thu a sawi.
He hri kai mi 180 zinga 10 chu Odisha pawn lam mi niin pakua chu district dang danga mi an ni bawk tih Sundergarh district medical officer Kanhucharan Nayak chuan a sawi.
He district-ah hian Inrinni khan a kai hmuh chhuah mi pasarih an awm tawh bawk.
Scrub typhus hi rannung, chigger (larval mite) veiten mihring an seh atanga kai a ni.
Miin ni li ni nga vel khawsik a neih tawh chuan inendiktir tur a ni a, a thlawna tih vek theih a nih thu a sawi.
Scrub typhus vei leh vei loh hi Rourkela Government Hospital leh Sundargarh district health centre-ah endik theih a ni.
Health department chuan Accredited Social Health Activist (ASHA) leh Auxiliary Nurse & Midwife volunteer eng awm zat tirin he hri darh zel tur ven nana hma la tur leh inzirtirna kalpui turin an ti.
Odisha-ah hian mi pasarihin an thihpui tawh a. Heng zinga paruk erawh Bargarh district-a mite niin pakhat chu Sundargarh a ni.
Health department chuan Inrinni khan Veer Surendra Sai Institute of Medical Sciences & Research (VIMSAR), Burla atangin Bargarh-ah member pathum awmna medical team a tir a, anni hian a darh zel tur venna kawng an enpui dawn a ni.
Bargarh district-ah hian rannung seh natna vei mek hi mi 11 an awm a ni.
He hri hi ramhnuai leh lova feh zingah a kai an tam zual.
Scrub typhus hi khawsik bakah an taksaa dum awm, ‘eschar’ an tih awmin a lang chhuak ber a ni.