Kum 1950 china Aizawl a inbengbel thlah ten pawl an din, Aizawl Mihlun Thlahte chuan an pawl inkhawmpui lian, HIGH COUNCIL vawi 4-na chu zirtawpni khan Synod Conference Centre, Mission Vengah an hmang.
He hun hi Aizawl Mayor leh Aizawl Lal Hmasa Ber, Lalsavunga Sailo Tuchhuan ni bawk, Lalrinenga Sailo chuan khuallian niin a hmanpui a. Aizawl Mihlun Thlahten an buatsaih, Aizawl nun leh chanchin tar lanna, ‘Hei Le! Aizawl’ tih lehkhabu a tlangzarh.
Lalrinenga Sailo chuan, Aizawl khawpui hmasawnna atana AMC-in hma a laknaah Aizawl Mihlun Thlahte’n finchhuah a tawiawm turin a sawm a. Aizawl chu khawpui thang chak tak anih avangin a mi cheng ten hawihhawmna leh hmasawnna lo thleng zel dawngsawng thiam a, insiam rem tulnaah insiam rem thiam turin Aizawl mipuite a sawm.
High Council hi an pawl Chairman K. Liantlinga chuan a kaihruai a. General Secretary V. Lalnunthara (Mathara) chuan annual report a pe a. An member thi ta mi 12 te hriatrengna hun an hmang bawk.
Aizawl Mihlun Thlahte pawlah tun dinhmunah member 1,021 an awm.