Khawzawl Zaingen branch YMA-in nimin khan an branch din champha kum 75-na ( Platinum Jubilee) chu Zaingen Branch YMA Hall-ah an hmang a. Bialtu MLA, Deputy CM Tawnluia’n hmanpuiin, Jubilee lungphun hawngin souvenir a tlangzarh bawk.
Deputy CM chuan Khawzawl Zaingen branch YMA hruaitu hmasate zahna chibai bukin, YMA chu pawl lian tak, thalaite fuan- khawmna, Mizo hnam chawisanga, hnam thinlung, tihphung leh zia- rang te vawngnunga venghimtu pawl ropui tak a nih thu a sawi a. Sorkar tha tichak tura YMA hruaitu ten thurawn tha tak tak an pe thin leh an theihna zawna ke pen an inhuam thin pawh lawmawm a tih thu a sawi.
Zohnahthlak, thena- wm ram atanga lo lut te sorkarin riltama an awm a phal loh thu Tawnluia chuan sawiin, theihtawp a chhuah zel thu pawh a sawi a. Zohnahthlakte inpumkhatna leh inunau- na kawnga YMA hnatha- wh ropui a tih thu a sawi.
Deputy CM chuan khawtlang hruaitute nen tangkawpin Zaingen hmun hlui cheithata humhalh a nih thu pawh sawiin, Puchhuan lung atanga Thlanpui thleng motor kal theiha siam a nih thu a sawi a. Rambuai vanga Khawzawla khaw hrang hrang sawikhawm an nih lai leh tun dinhmun khaikhina hmasawnna ropui tak hmuh theih a ni pawh ropui a tih thu a sawi.
Kalkhawmte chu Mi- zo hnam chhanchhuah, humhim leh chawisan kawngah theihtawp chh- uah theuh turin Tawnluia chuan a sawm a. Mizo nun ze mawi – tlawmngaihna, aia upa zah, then- awm khawvengte ngaihtuahna leh inhmangaihna ropui tak chu vawngnung zel turin a chah.
‘YMA takin aw’ tih tawngkam chu hawihhawmna, inthliarh- ranna awmlohna leh midang tana inpumpekna keng tel tawngkam a nih thu Tawnluia chuan a sawi bawk. Deputy CM chuan Zaingen Veng huam chhunga kum 75 chin te chu jubilee pualin Rs. 1000 theuh a pe bawk.
CYMA atanga he hun hmanpuitu CYMA Treasurer Fabian Lalfakawma pawhin thu sawiin, mahni ram leh hnam ngaisanga, ngaihlu leh dahsang thiam te chu khawvelin a zah thin tih a sawi a. YMA chu pawl huapzo tak a nih thu a sawi.
Khawzawl Zaingen branch YMA hi September ni 16, 1948 khan Zaingen khua Thalthlithaw Veng Primary School-ah din a ni a. Member 447 awm mek a ni.