MNF South Tuipui East Block huaihawt Block Conference hmanpuitu, MNF Adviser, Dr R Lalthangliana chuan MNF sorkar lai ngeia Zohnahthlakte lo tuam hlawm an ngai chu Pathianin thil tum a neih ka rin thu a sawi.
Inrinnia Thingsai Community Hall-a hun hmanah South Tuipui bialtu MLA Dr R Lalthangliana chuan MNF sorkar lai ngeia Myanmar, Bangladesh leh Manipur lam atanga Mizo hnahthlakte lo tuam hlawm an ngai chu Pathian hian thil tum a nei nia a rin thu a sawi a. Nakkinah chuan India ram chhung leh pawn thlenga ‘Zomi’ an tihte hi rorelna pakhat hnuaia an awm theihna turin chung lam hian thil tum a nei nia a ngaih thu a sawi.
Dr R Lalthangliana chuan zawlnei ni lo mah se, kumin MLA inthlanpui lo awm turah Pathian khawngaihna avanga MNF an sorkar leh ngei a rin thu a sawi a. Covid-19 leng avangte, sorkar kal tawh zawng zawng leh ram dangin an tawrh ve loh, tun MNF sorkarah chuan vawk hri leng te, lirnghing te, ram kang te, ramriah inkahna te, raltlan lo chhawmdawl ngaia harsatna hrang hrang karah, Chief Minister Zoramthanga kaihhruai sorkarin ram tana rotling hna tam tak a thawk niin a sawi bawk.
Inrinni vek khan Health Minister Dr. R.Lalthangliana hian Cherhlun PHC tlawhin thawktute leh damdawi in dinhmun a enfiah a. X-ray khawl dahna hmun turte a enfel bawk.
Hospital poor fund atan Rs.10000 hlanin damlo admit mek zawng zawngte tangka faiin a kan nghal a ni.