AIZAWL: Congress Legislature Party (CLP) leader Zodintluanga chuan Mizoramah puipunna hmuna zu rui an awm thin chuan a chhanah Mizo society-in a pawm vang nia a ngaih ve loh thu sawiin, “Dan leh thupek kenkawhna a hlawhchham vang zawkah ka ngai,” tiin, Mizoram sorkar chu zu tihrem tumna tak tak nei lohah a puh.
CLP leader hian thuchhuah siamin ZPM Leader Lalduhoma’n ‘Mizoram anga vantlang puipunnaa zak miah loa zu rui an chetna hi khawvelah a vâng khawp ang. Society-in kan pawm vang, society-in kan demnat tawk loh vang’ tih a sawi chungchanga a ngaihdan a tar lang.
Congress sorkar laia dan hnuaia zu zawrh tan tirh a nihin zu rui hmuh tur an tam thu sawiin Zodintluanga Ralte chuan, “Dan tha taka kenkawh niin, zu ruih avanga mante chu vantlang hnate thawhtir an ni. Hun a kal deuh hnu chuan khawlai chu sawi loh, puipunna hmunah zu rui hmuh tur an awm meuh tawh lo,” a ti.
CLP leader chuan Mizo society chu society tha tak a nih thu sawiin, “Puipunna hmuna zu rui hau chiam duh khawpa mi dang hnawk ti tam lohna society kan ni,” a ti a, buaina an siam a, mi dang tana hnawksak taka an che a nih loh chuan Mizo society-ah miin zu a ruih avang ngawta hmusit taka hau an tam loh thu a sawi.
Vantlang hmuna zu ruih chu a thlawp loh thu a sawi rualin Zodintluanga chuan, “ZPM leader sawi anga vantlang hmuna zu ruite zak map loa an lo che thin a nih chuan kan society ni loin, kei chuan dan leh thupek ka mawhpuh zawk. Vantlanga hmuna zu ruite hi dan anga hrema man fo ni thin se chuan tumah an rui ngam hauhin ka ring lo,” a ti.
Zodintluanga chuan sorkarin a hming maia zu zawrh a tihtawp thu sawiin, “ZPM leader-in vantlang hmuna zak miah loa zu rui an chet thin thu a sawi hian zu khap hlawhchhamzia a tilang chiang hle. Kan sorkar hian a hming maiin zu zawrh a khap niin a lang,” a ti a, zu tihrem tumna tak tak nei loah sorkar a puh.
CLP leader chuan sorkarin zu zawrh khap siin dan leh thupek kengkawhtu (Excise dept.) a thuam chak tha duh lo tih sawiin, “Kan khawpui ber, Aizawl dai maiah zu zuar leh zu lei tur ni tin zan tin an phu suau suau a ni. A duhnaah pawisa a ren loh laiin, zu khap duh sorkar hian excise dept. tan sum a nei thei si lo. Kan thalaiten zu an nghei ngawt thei loa, an hmuh chhun zu tha lo an in avangin an thi zawih zawih a ni,” a ti.