Assam sorkarin ramri buai chin fel kawngah inbiakna neih leh an duh a, tun hnai khan Aizawla minister-te inbiak chhunzawm tura rawtna chu home department hotute hnenah an thlen.
Home department hotute hnen atanga thudawn danin Assam sorkar inbiakna neih tur chungchanga rawtna an thlen hi Mizoram sorkarin a chhang let lo va. Tun kar chho hian harsatna a awm loh chuan chhan let hman beisei a ni.
Assam sorkar hian Aizawla minister-te inbiaknaah hian ramri buai chin fel dan tur ruangam sawiho leh state pahnih aiawhte telna ‘Regional Committee’ din rawtna an thlen tel.
Mizoram sorkar lam chuan Assam sorkarin an ram anga an ngaih khaw 62-te chu Mizoram chhunga mi ngei a ni tia an dinna an tar lan Assam sorkar hnena an thehluh tawh chu official-ten kimchang takin sawiho phawt se tih chu an ngaihdan a ni a. Hemi chungchang hi kimchang taka sawiho a nih hnuah chauh state pahnih minister-te inbiak ni se tih chu an duhdan a ni bawk a. Chuvangin, thuneitu sang zawk hnenah hemi chungchang hi thlen a ni a, an thutlukna nghah mek a ni.
Mizoram leh Assam inrina kilometre 146 a thui a ramri buaiah hian tharum thawhna tenau a thleng deuh reng a. Ramri buai ching fel tura inbiakna erawh ngawrh taka kalpui a ni ngai lem lo.
Kum 2021 July 27-a Vairengte daia Mizoram leh Assam Police an inkah hnu erawh chuan ramri buai chin fel tum hian a tak taka inbiakna kal chhohpui a ni ta a. Official-te vawi eng emaw zat an inbiak tawh bakah Home Minister Lalchamliana kaihhruai Mizoram sorkar aiawhte leh Assam Border Protection & Development Minister Atul Bora kaihhruai Assam sorkar aiawhte chu hemi kum vek hian inbe tanin Aizawla vawi hnih an inbiak hnuah nikum November thla khan Guwahati-ah an inbe leh a. Tunah hian a vawi lina atana inbe turin ruahmanna siam mek a ni.
Chief Minister Zoramthanga leh Assam Chief Minister Himanta Biswa Sarma te chu Delhi-ah ramri buai chin fel tumin vawi hnih an lo inbe tawh bawk a ni.