Manchester City in kuminah an lallukhum humhim tura mi tam takin an rin chhan lantirin tunhnaia che tha tak West Ham United laka si phur hmasa mahse 3-1 in an chak.

London Stadium-ah City in hnehna an chan avangin khelh nga atangin point 15 an hmu a, hmahruaitu an ni chhunzawm.

Hammers tan midfielder thar James Ward-Prowse chuan a club thar tana a chetthat nghal chu chhunzawmin first half-ah an hmahruaina goal a tauh lut.

Mahse second half-ah Manchester City tan mi thar a inlar ve a. Jeremy Doku chuan second 43 chhungin an si phurh a sut.

City hlauhawm tulh tulin Julian Alvarez-a ball fing atangin Bernardo Silva chuan an goal hnihna a khung a. Huntawp hma in chance tha vawi engemaw zat hloh tawh Erling Haaland chuan an goal thumna a khung.

City manager Pep Guardiola chuan, “Inkhel tluanin kan kheltha em em vek, halftime-ah team tha tak laka kan hniam zawk chung pawhin kan tha. Second half-ah kan chiai mai lova, tihsual kan nei lo bawk.” tiin a sawi.

Liverpool ‘comeback’

Season bul tan tha dang Liverpool in first half-ah beisei pha lo mahse second half-ah a chhanletna an nei. Wolverhampton Wanderers 3-1 in an hneh.

Molineux Stadium-ah Wolves in first half inkhel an thunun tha hle. Ball an chan chu awmze neiin an inpe kual thin a, team hlauhawm zawk an ni.

Minute 7-na lekah counter-attack fing leh hlauhawm atangin Hwang Hee-chan chuan goal a khung a, a goal khung kawngah Pedro Neto a fakawm.

Second half-ah erawh Reds an insiamtha. An inkhelhdan siksawiin awmzia a lang nghal thuai.

Cody Gakpo chuan Mohamed Salah ball pet luh kawh tak chu an si phurh sut nan a khung a. Premier League a vawi 200 a inkhelhnaah Andy Robertson chuan minute 85-naha goal a khung leh bawk a. Substitute Harvey Elliot chuan huntawp hma in an goal thumna a khung.

Jurgen Klopp-a pawlte hi match nga an khelh tawh atang si phur hmasa ni chunga an chak tum thumna a ni.

Klopp-a chuan, “First half-ah kha chuan stadium luh dawnah kan inko khawm chawp a, kan inkhelh dan tur kan sawiho chawp ang vei mai a ni. Mahse kan inkhela a tha lai erawh second half-ah khatiang em em a chhia a khelh leh ngaihna chuang a awm lo kha a ni a. Kan insiamrem hnuah inkhel kan kaihruai tha a, kan result thlak danglam turin kan dawhthei a ni.” tiin a thlirlet.

Brighton pawh 3-1

Manchester United in Old Trafford-ah Brighton & Hove Albion an mikhual a. Mahni mualah 3-1 in an tlawm.

Chak mamawh United in season bul an tan chhiat avangin an chungah beiseina phurrit a lian. Brighton lakah bul tan chhe lo mahse coach fing Roberto de Zerbi-a’n a naute a siamrem hnuah United in chan tha zawk chanlai an nei mang tawh lo.

Minute 20-naah United chherchhuah striker Danny Welbeck chuan a club hlui lakah goal a khung a. Second half-ah Pascal Gross chuan an goal hnihna khungin Joao Pedro hmangin Seagulls in goal an khung leh a. United tan hian midfielder Hannibal Mejbri chuan goal khat a khung ve a ni.

United hi thla 13 chhunga an mual a inkhel a an tlawm leh hmasak ber a ni a. Nimahsela Brighton tan record duhawm thleng ve thungin a zawnin Premier League inkhel bikah United vawi li an hnehna a ni.

Brighton manager Roberto De Zerbi chuan, “Chak kan phu a, kan kheltha tak zet. A tir minute 20 vel kha chu kan beisei loh dan anga an inkhelh avangin harsa kan ti. Mahse ball kawl rei deuh tura kan insiamrem hnu khan inkhel a danglam.” tiin a sawi.

Huntawp dawnah Spurs

Tottenham in minute 90 pelhah goal hnih an khung a, 2-1 in Sheffield United an hneh.

Tottenham Hotspur stadium a inkhelah Blades in Ben Hamer hmangin second half-ah goal an khung a. Inkhel tawp hma in minute 16 pek belh a ni a. Hetih chhung hian Brazil striker Richarlison chuan minute 98-naah an si phurh sutna goal a khung a. Dejan Kulusevski chuan minute hnih hnuah chakna goal a khung.