Chef an ti a, Mizo tawng chuan ei siam thiam tihna a ni. Garima Arora chuan ei siam thiam chawimawina sang, Michelin star an tih a dawng a, ani hi Indian hmeichhe zinga hetiang chawimawina dawng hmasa ber hi a ni a. He chawimawina hi Gaa, Bangkok, Thailand-a a thingpui dawr vang a ni.
“A nuam tak zet a ni,” tiin a chawimawina dawn chungchang hi Arora chuan a sawi a. Kum 21 a nih atang chauhvin ei siam lam hi a buaipui tan a, a pianna, Mumbai khawpui chhuahsanin Paris khawpuiah, khawvel hriat thama ei siam zirna lar, Cordon Bleu culinary school-ah a lut zui.
Tuna kum 30-a upa ni ve tawh, Arora chuan, “Ka lo suangtuah thin aiin a nuam zawk,” a ti a. “Mahse, hmasawn zel ka duh a, thil dang beih zel pawh ka la tum a, tuna mite aia tui leh tha hi la siam chhuah zel ka tum,” a ti bawk.
Kum 21 a nih thleng chuan chanchinbumi a ni a, a hnuah ei siam lamah a kal ta daih a, a hlawhtling ta viau mai. An chhungkua hi Punjabi an ni a, an hnamin ei tur tuihnai leh tha an duhna chu a ei zawnna atana puitu leh he lam kawnga a kal chhan pakhat a nih thu Arora chuan a sawi.
Punjabi cuisine hi India-ah chuan mite duh em em a ni a, an chin chhuah tho – butter chicken leh parantha te phei chu ram hrang hranga hriat hlawh a ni a. Punjabi hi ei in duh leh duhtui tia hriat an ni bawk.
Arora hian a chawrchhuahna hnam chu tuna ei siam thiam a nihnaa tangkai a nih thu a pha bik lo. “Mi ina chaw kan ei hian, ‘hetiang hi ti ve ila’ ti rilru puin kan haw a. An tih ang chu kan mikhual neih veleh hunah pawh chhawp kan duh a, kan tum thin,” tiin an hnamin ei in an lawm chu a tangkaipui tih a sawi.
An hnam piah lamah hian a pa chu ei siam lama amah tikaltu a nih thu a sawi bawk a. A pa hian an inah thil chi hrang hrang a siam a, chumi entawn chuan ei siam hi a tui ve ta niin a insawi a. “Ka pa hian risotto leh hummu siamte hi a chiang a, chu chu kum 1990 chho kha a ni daih tawh a, hetih hun lai hian India-ah hetiang hi tumahin an la hre lo hial ang,” tiin a pa chu ei siam lamah a lo bengvar hmazia a sawi a ni.
Arora hian a star dawn chu amah chawimawina satliah mai ni lovin, a sumdawnna tihlu zualtu tur a nih thu a sawi a. A thingpui dawra ei siama a thawhpuite pawh chhuanawm a tih thu a sawi a, Gaa-ah inpumpek zel a tum a, tuna an chhawp thin aia tui zawk pawh duan chhuah zel a tum a ni.