Kumin Formula One season thununtu Red Bull Racing chak zawnlai tihtawp a ni a. Ferrari car khalhtu Carlos Sainz chuan Singapore Grand Prix-ah pakhatna a luah.
Marina Bay Street Circuit-ah hian Spanish driver hian thiam taka intlansiak a tir atanga a tawp thleng thununin a chak theihna turin tawngpawng tlanchak aia thluak hman a pawimawhna lantirin hnehna a chang.
A zawna vawi 10 chak tawh Max Verstappen chu pangana a ni pha chauh a. A zawna intlansiak vawi 15 chak a record siamtu Red Bull Racing tan kartawp duhawm a ni lo. McLaren driver Lando Norris chu pahnihna niin Mercedes car khalhtu Lewis Hamilton chu pathumna a ni.
Thluak hmanga hnehna
Kum 29 mi Carlos Sainz Jr. hi vawi hnih World Rally Championship a champion tawh Carlos Sainz fapa a ni a. Motorsport a hming mikhual tak a ni lo.
Kum 2015 a F1 a luh atangin driver theihna nei sang a ni tih hriat nghal nimahsela a tan hnehna chan theihna turin huntha a inhawng fo ngai lo.
Kum 2021 khan Ferrari a zawm a, Italian team-ah hian beisei nei sang mahse a teammate Charles Leclerc chu a langsar zawk thin.
Nimahsela kuminah Sainz-a’n an team a “no.2 driver” a ni bik lo tih a lantir mek. Intlansiak hnuhnung berah Italy-ah qualifying-ah pole position changin Red Bull car eltu ber a ni a, tun hnaiah inrintawkna thar a chhar chhuak. Singapore-ah pawh intlansiak bakah Zirtawpni practice leh Inrinni qualifying zawng zawngah a tlanchak thei hle.
Lehlamah Red Bull in tun tumah harsatna an tawk a, an car setup chu fuh tawk lovin practice session atangin midang tlan angin an tlan thei lo. Verstappen leh Perez ten qualifying-ah Q3 an lut zo lo ve ve a, 11-na leh 13-na atangin bul an tan.
Intlansiak tan atangin Sainz-a’n hma a hruai a. A teammate in pathumna atang pahnihna luah nghalin Leclerc hi Sainz-a dinhmun ti tha turin a team in an thlawp tir.
Inumna hmuhnawm takah chak inbeisei ngam team pathum zingah McLaren leh Mercedes te an tel. Mercedes in team dang neih tawh loh medium tyre an dahthat chu intlansiak tawp lamah an hmang a, midang zawng aia tlanchak zawkin Sainz hi an um.
Mahse Sainz-a’n a thluak a vawrh. Mercedes car pahnih leh amah inkara tlan Lando Norris awm chu a chhawr tangkai. Norris hian George Russell leh Hamilton te a dal rei theihnan tiin DRS hmang thei turin McLaren driver hi a inhnaihtir thin a, a tana hlauhawm ni pha si lo turin Norris chu DRS hmangin a tlan chak zual tir thin.
Sainz-a tactic a hlawhtling a, Norris an um phak loh bakah Russell chu lap hnuhnung berah bang a tai avangin a chesual zui.
“Duhthusam a ni”
Hnehna changtu Sainz chuan, “Ka tan kartawp duhthusam a ni. Zirtawpni atang tawhin kan tha em em vek a, a pawimawh hunah tihsual nei miah lovin kan tihtur kan ti dik chat chat.”
“Lando-a tlanchak theih zawng kha ka hrethiam a, inlehpelh harsatna hmun a ni bawk. Hard tyre kan hman avangin Mercedes khan an lehpelh chuan ka tan dan ngaihna an awm dawn lo tih ka hria.” tiin a chak dan a sawi.
