Real Madrid in tun season La Liga-ah hnehna an la chan vek chu chhunzawmin Pathianni zanah Real Sociedad 2-1 in an hneh.
Santiago Bernabeu-ah an mikhual La Real te hian goal khung hma hle mahse Los Blancos an tho leh thei a. An striker lakluh thar Joselu chuan chakna goal a khung.
La Real tan Spanish forward hmabak nei eng tak Ander Barrenetxea chuan minute 5-naah goal a khung a. Loan a Real in an hawh mek goalkeeper Kepa Arrizabalaga chuan a pet hmasak dansak mahse a vawi hnihna a dang thei lo.
Basque khaw club hi La Liga-ah hian halftime a hma an hruaina inkhelah match 46 chhung tlawm nei miah lo an ni a. Nimahsela second half tan hnu lawkah Federico Valverse-a’n Real Madrid si phurh a sut hnuah Blancos tan chak a beiseiawm telh telh.
La Real in goal hlauhawm insiam ve thovin Barrenetxea in a goal hnihna khung teuh mahse Real Madrid zawkin remchang an neih an chhawr a. Brahim Diaz cross atangin Joselu-a’n chakna goal a khung.
“He league-ah hi chuan eng team pawhin mi an tibuai viau thei vek a, hei vang hian goal kan chhuah hma khan insiamthat ngaihna lai kan nei tih a tilang.” tiin Joselu chuan a sawi a.
“Bernabeu a inkhelh hi chu a danglam a, fans ten phurna min pek avangin kan insiamrem thei a ni.” a ti.