Parliament building hlui chu ‘Samvidhan Sadan (Constitution House)’ tih a ni dawn tih Prime Minister Narendra Modi-a’n building hluia thu a sawi hnuhnung berah a puang.
Thu a sawi zawhah hian ke-in MP dang zawng zawng nen parliament building tharah a hruai a, hemi atang hi chuan building sak thar hi Indian parliament a ni tawh dawn a ni.
“Vawiin hian kan chhuahsan ang a, parliament building thar kan pan dawn a. Vawiin hi Ganesh Chaturthi a ni chiah bawk,” tiin Modi-a hian a sawi a, a bula rorelna in hniha speaker pahnih sawmin building thar an pan zui a ni.
“Tunah hian parliament building thar kan pan dawn a, he in ropuina hi a chuai dawn chuang lo. ‘Old parliament’ tiin kan ko dawn lo va, in pahnih phalna ka dil a, ‘Samvidhan Sadan’ tih a ni dawn a. ‘Samvidhan Sadan’ tia kan koh chuan Constituent Assembly-a lo thu tawhte inzawmna a nei dawn a. Chhuan lo awm leh zel turte hnena kan hlan theih thil remchang hi a lo thlawnin kan liamtir tur a ni lo vang,” a ti.
British architect pahnih, Sir Edwin Lutyens leh Herbert Baker ten an duan, parliament building hlui zawk ni ta hi kum 1927-a sak zawh kha niin kum 96 zeta upa a ni ta.
Lok Sabha inkhawmah Thawhtanni khan prime minister hian thlahna thu a lo sawi tawh a, MP-te chu building tharah ‘beiseina leh inrintawkna’ nena lut turin a sawm.
Sorkar chuan building hlui hi a thiat dawn lo va, thil danga hman theih turin thuam erawh a thuam tha nual dawn a. A hmun thenkhat chu museum atan cheibawl a ni dawn nia sawi a ni.