Tun hnaia thlalem atanga thla lakah North Korea chuan Yongbyon nuclear complex-a uranium a sawngbawlna chu a tilian nasa thar hle tih a hmuh theih a, bomb siamna hmanrua lamah hma a la thei leh nasa niin mi thiamten an ngai.
Monterey-a Middlebury Institute of International Studies chuan satellite imagery company Maxar-in thla an lak atangin Yongbyon leh a chhehvelah hnuhma thar a tam hle tih a lang.
Institute-a mi, Jeffrey Lewis leh mi thiam dang pahnih chuan, “Hetianga an plant an tilian a nih chuan Yongbyon-a North Korea-in uranium hmanga siam ralthuam a siam hi 25% talin a pung ang,” an ti.
North Korea hian kum 2019-a United States nen an inbiakna a hlawhchham hnu, thla ruk chhunga a vawi khat nan tun hnai khan ballistic missile a lo enchhin tawh nghe nghe.
Middlebury-in an report dan chuan thlalem atanga thlalakah hi September 1-a mi niin North Korea hian in sak nan thing an kit a, lei laihna khawl hna thawk pawh hmuh a ni.
A hnu chawlhkar hniha thla an lak lehah chuan bang pin a ni a, mi dang luh mai theih loh turin in pawh duan hna thawh a ni tih a lang.
A hung chhung hi sq. metre 1,000 vel a ni a, thil dahna tur 1,000 vel siam theihna a ni a, heti a nih chuan uranium sawngbawl hi 25% talin a pung theihna niin an tar lang.
Kum 2019 kumtir lama President Donald Trump-a leh North Korean leader Kim Jong Un an inkawm tum khan US-in a hrekna tam zawk a hlip a nih chuan North Korea hian complex pum tihchhiat a rawt a; mahse, US hian a hnawl.
US leh South Korean mi thiamte chuan North Korea hian uranium enrichment plant pakhat a kalpui reng niin an sawi a. Kum 2018 khan South Korean thuneitu pakhat chuan parliament-ah North Korea hian nuclear ralthuam 60 vel a siam tawh tih a lo sawi tawh.