Aizawl : Aizawl West – II ZPM Candidate Lalnghinglova Hmar chuan Mizoram khaichhuak turin tu party nge an thlan dawn tih ngaihtuah chian a pawimawh hle tih sawiin, uluk taka duhthlanna siam turin mipuite a sawm.
Aizawl South I huamchhung Bethlehem Vengthlang-a ZPM Street Campaign-ah thu sawiin Lalnghinglova Hmar chuan, ZPM-in sorkar chak tak leh ropui tak an din ang pawh an ti ngam lo a; mahse, tun aia tha zawk sorkar erawh chu din an tum tih sawiin, “Tuna kan thlen chinah hian kan lungawi em tih hi ngun takin ngaihtuah ila, tun hmaa kan la thlan tlin ngai loh te hi huaisen takin i thlang ngam ang u,” a ti.
Hruaitu an that chuan ram a tha thei tih sawiin Lalnghinglova Hmar chuan, “Vawi leh khatah mipui hian hma kan sawn thut thei lo a, ram hruaitu tha kan neih chuan mipui hi kan thain hma kan sawn thei ngei ang tih hi ka ring a ni. Danglam ngam, beiseina nei, Mizoram tha zawk, Mizoram danglamna thlentu ni turin ZPM te kan inzuar,” tiin, danglam ngam ZPM ni turin tun atangin hma la tan turin party mite a sawm a. Kalphung thar chu tun atangin tan a, a famkimna erawh chu an sorkar hunah a lang tur an nih thu a sawi bawk.
Street Campaign-ah hian Aizawl South – I MLA C. Lalsawivunga leh ZPM PAC member K. Laltluangkima te’n thu an sawi bawk.