India leh Saudi Arabia ramte chuan nimin khan kawng hrang hranga thawhhona tur chi nga an ziak a, heng zingah hian khualzin leh in sak lama thawhhona tur pawh a tel a. Inremnate hi prime minister Narendra Modi leh India-a lo zin mek, Crown Prince of Saudi Arabia Mohammad Bin Salman bin Abdulaziz Al Saud te nimina New Delhi-a an inbiak hnuah an ziak a ni.
Prime minister Modi chuan India leh Saudi Arabia chuan hriat reng tawh turin vantlang tan leh sum leh pai lama thawhhona tur an ziak tih a sawi a. Saudi Arabia chu hun rei tak ata tawh India thawhpui a lo nih tawh thu a sawi bawk.
Prime minister chuan India leh Saudi Arabia hian ram venhimna lamah leh ei bar zawnna kawngah te thuk leh zau zawkin thawhhona tur an neih belh leh ta tih a sawi bawk.
Crown Prince hi nimin tuk khan Rashtrapati Bhawan-ah lo dawnsawn a ni a. Thuthar lakhawmtute a kawmnaah Crown Prince chuan India leh an ram chu ram pahnih tana hlawkna tura inkawmngeih lehzual a duh thu a sawi a. Ram pahnih thatna tur thlen tur hian a ram hruaitute ve veah rinna a nghah ngam thu a sawi bawk.
External affairs minister Sushma Swaraj pawhin Crown Prince Mohammad Bin Salman bin Abdulaziz Al Saud hi a kawm bawk a. Kawng hrang hrang – ram venhimna, insumdawn tawna, investment leh thil danga ram pahnihte inkungkaihna tur thil an sawi dun a ni.
Crown Prince hian nizan khan President Ram Nath Kovind pawh a kawm a. Council of Ministers-a an Vice President ni lai leh Kingdom of Saudi Arabia-a Minister of Defence nihna chelh mektu ni bawk, Crown Prince hi an ram mi pawimawh tak takin an tawiawm a, heng zingah hian minister, sorkar thuneitu sang leh Saudi sumdawng liante pawh an tel.
Tun hnai kum eng emaw zat chhung hian ram pahnihte inkar hi a tha hle a. Ram pahnih inkara sumdawnnaa sum che hi 2017-18 chhung khan $ tld 27.48 a tling phak a, Saudi Arabia hi India-in sumdawnna lama a kawppui lian ber 4-na a ni phak.