Thingsulthliah Higher Secondary School zirlai za rualte chuan Adhoc Grant in Aid-a hlan kai phutin nimin khan ke-in Aizawl an pan a, he an thil phut thlawp hian Mizoram hmun thenkhat zirlaiten kawng an zawh.
Thingsulthliah Higher Secondary School Students’ Union-ten an lo ruahman lawk tawh angin nimin khan Adhoc Grant in Aid-a hlan kai an nih theihna tura sorkar nawr nan Aizawl thleng ke-in kawng an zawh a, zirlai 111 bakah an nu leh pa a thei theiin an zui a. Thingsulthliah HSS zirlai long march hi MIGLAHSSA member-ten an remchan angin senso atan pawisa thawhpuiin mahni khuaah an remchan angin an lo zawm ve bawk.
Thingsulthliah zirlaite hian Adhoc Grant in Aid-a hlan kai phutnna lehkha hi chief minister leh education minister hnenah an theh lut dawn a ni.
ZPM Thalai chuan Thingsulthliah HSS zirlaite hi Bûngbângla-ah thei tui leh ei tur nen an lo hmuak a. MNF sorkar hnuaiah zirna ngaihthah a ni leh an thutiam an bawhzui loh luat avanga zirlai naupangten an zirna thulh a, hreawm tuara an pen chhuah a ngai ta chu pawi an tih thu an sawi.
Thingsulthliah Higher Secondary School zirlai hmalakna thlawpin Phullen Sakawrdai, Zawlnuam, NE Khawdungsei-a Higher Secondary School zirlaite pawhin nimin khan an khuaah theuh kawng an zawh a, E.Lungdar HSS ten banner kengin West Phaileng HSS ten No Teaching day an hmang nia thu dawn a ni bawk.