Atletico Madrid lakah huntawp dawnah Lazio goalkeeper Ivan Provedel chuan an si phurh sutna goal a khung a. UEFA Champions League a an inkhelah 1-1 in an inhnehtawk.
Stadio Olimpico-ah club pahnihten tun season Champions League group stage a an match hmasa ber an khel a. Atletico hian first half a goal khat an khung chu an hum tluan dawn niin a lang hman.
Nimahsela minute 95-naah corner an hmu a, Provedel hi ball vawrh luh changtu zinga tel turin lehlam goal-ah a lut phei. An corner vawrh luh chu Atletico defender ten petchhuak mahse Luis Alberto chuan ball a chang lehnghal a, duhthusam a cross tha siamin Italian goalkeeper hian a tauh lut.
Provedel hian professional football a a goal khung hmasak ber a ni lova, kum 2020 khan Juve Stabia tan loan a a khelhlaiin Ascoli laka an si phurh sutna goal a khung tawh.
UEFA Champions League chanchin a goal khung thei goalkeeper palina a ni a, kum 2000 atanga 2009 chhunga penalty vawi thum khung Hans-Jörg Butt, kum 2009 December a goal khung Sinan Bolat leh kum 2020 September a goal khung Vincent Enyeama ten an lo khung tawh.
Atletico Madrid tan hian first half-ah Spanish midfielder beiseiawm Pablo Barrios chuan goal hmahruai a khung a. Alvaro Morata chuan goal ban pet per bawkin Provedel hian save tha engemaw zat a siam tel.
Lazio manager Maurizio Sarri chuan, “Kan football khelh enin halftime a hniam zawk kha kan phu lo, mahse tiang hi thil thleng thei a ni. Tunhnaiah kan che tha lo niin an sawi a, mahse kan match hnuhnung pathumah Napoli, Juventus leh Atletico kan hmachhawn a, chak, tlawm leh draw kan nei a, thil chhia a ni lo.” tiin a sawi.
Atletico Madrid head coach Diego Simeone pawhin, “Kan khel tha, Lazio kha ball an chanin an hmang tha zawk a, mahse hlauhawm siam turin ball an chan a ngai. Kan goal khung kha vannei tiin sawi theih mahse goal kan neih hnuah kan kheltha hle.” a ti.