Manipuri actress lar Soma Laishram chuan civil society pawl lian Kangleipal Kanba Lup-i’n beauty pageant-a inlan vanga film reng renga inlan tawh suh se, tia khap an tumna chu na takin a chhanglet.
State chhunga buaina nasa tak chhuah laia New Delhi-a beauty pageant-a inlan vanga film-a inlan khap tur leh puipunna hmuna lang ve tawh lo tura an khapna chungchangah Soma hian social media-ah video kaltlangin a chhang.
“Artist leh social influencer ka nihna angin an hmalakna leh thil tum hi na takin ka dodal tih ka sawi duh. A tul hun leh tul dan azirin ‘aw’ chhuah theihna chanvo ka nei. Ka state leh ka inpui (Manipur) tan thil dik lo engmah tih ka nei lo,” a ti. Heti anga a laka khapna thupek chhuah a ni chuan a barakhaih thu leh rilru hrehawm taka a sawm thu a tarlang tel.
“Northeast festival-a Manipur aiawh tura kohy ka nih khan ka state thlawp duhna rilru nen chauha kal ka ni a, mi sang chuang pungkhawm hmaah thil awmdan dik tak (tharum thawhna lo chhuahna phena thil awma) te dik zawka puanchhuah theihna remchanga ngaiin ka inlan mai a ni,” tiin kum 31 mi actor hian a sawi bawk.
Hetih lai hian, a laka khapna thupek rum tak chhuah chungchangah mi tam takin an dem a, film association hrang hrang pawhin ‘awm’ an tihpui lova, a thlavang hauhna a ring hle thung.
Film Forum Manipur thuneitute pawhin heti anga inrawlhna hi thil vanduaithlak tak a nih thu leh tul an tih loh thu an sawi.