Thingsulthliah Higher secodary school chuan 20.9. 2023 khan an school chu adhoc grant in aid a dah phutin an school naupang ten ke in Aizawl thleng kawng an zawh ta hial mai. Chief minister leh education minister hmuha lehkha pek an tum zui mek a. Thingsulthliah zirlaite Aizawla an awm mek lai hian an khawchhunga office pawimawhte chu khar ani bawk a ni. Hetih mek lai hian mizoram chhunga heng khua Phullen, Zawlnuam, Sakawrdai leh NE Khawdungsei te chuan Higher secondary school adhoc grant in aid a dah phutin an khuaah mipuiin kawng an zawh hlawm bawk. Heng khua lo pawh hi hmun hrang hrangah zirna hmasawnna tura sawrkar nawrna thawm a awm hlawm mek a ni.
Zirna hi mihringte ti hmasawntu ber ani tih chu khawvel hriat a ni a. Chu hmasawnna kailawn chu mizote pawhin kan awt vek a. Zirna thaa zir kan duh vek a. Kan ban phak ve theih kan khuaah ngei zirna hmun hi awm se kan ti theuh a ni. Mipuiin kan duh em avangin khaw tam tak chuan mahni khuaah mipuiin pawisa thawhkhawmin harsa takin zirna inte kan lo din tawh hlawm a. School building hmun tur siamin hnatlang kan ko a, in kan sa a. Zirtirtu hlawh chu thlatin khuaah kan khawn a. Kan retheih pui nasa tawh hlawm hle. Kan khuaa zirna in hma a sawn theih nana kan beihna chu sawrkarin min han pui se kan duh ngawih ngawih a. Sawrkarah pawh kan dil nasa hlawm thin hle. Mahse, sum leh pai harsatna vang tho in sawrkar pawh a duh angin a che thei thin lo bawk.
Ram rethei, lakluh nei tlem state kan ni a. Mipui leh sawrkar pawh kan duh angin kan che thei lova. Zirna atana hmasawnna tur ringawtah pawh ke kan pen hlei thei lo chu a ni a. Heng mipui duhna te hi hre reng mahse kan ram hruaitute hian han tih leh chuan vak ngaihna an hre rih lo ani ber mai. Amaherawhchu hetih kara thil pawi thin chu inthlanna a lo awm dawna politician ten dawt hmanga mipui min bum a, vote an duh vanga an tih theih hauh loh tur mipui hnena min tiam thin hi a pawi a ni. Ram hruaitu inti, mipuiin kan ngaihsan em em ten an tih hauh loh tur min han tiam pawp pawp mai thin a. A tak ram thlen tir tumna pawh an nei chuang lova. Hei hi kan ram mipuite rilru tikhawlotu lian an lo tling chho ta. Thingsulthliah HSS pawh hi an biala Mla candidate khan tihhlawhtlin sak a tiam a. Chuvanga hetia huaisen taka nawr ngam hi an niin sawi a ni a. A tiamtu lah chu bial dangah a tlanchhe daih tawh bawk si. An tan tih theih a van tak em avangin ke in an rawn pen chhuak ta a ni a. Kan sawrkar hian a tiam leh phawt mai dawn nge ni anga, eng thu nge a fah leh dawn pawh hriat ani ta lova. Zirlaite rilru an hliam na zui zel dawn nge adhoc grant in aid chu an puang nghal mai dawn. A tihhlawhtlin chu sawrkar kutah a awm ta. Eng sawrkar nge kan neih a takin he khua hian an fiah mek a ni.
Inthlanna kan hmachhawn leh dawn mek a. Kan politician ten an thiam dan danin mipui min rawn dawr leh tan mek. Mipuiin thil tih theih leh loh tur min tiam vak vak ching hi engtinnge kan tih dawn. Kan politicainte thusawi hi ngaihthlak dan tawk thiam a, anmahni lo dawr dan tur tawk pawh kan ngaihtuah ve a ngai a ni. Tin, anmahni hun kal tawhah tlin duhna avanga dawt sawi mai mai thin mi an ni em tihte pawh thlir chian a tha khawp mai. Thutiam zung zung ho phei hi chu hnawl ngam an hun e.