AIZAWL: Presbyterian Kohhran, Electric Veng chuan nimin khan an kohhran kum 60 tlin, diamond jubilee an lawm a, tlaiah kohhran mipuiten jubilee lawmna ruai an theh.
Electric Veng Kohhran Diamond Jubilee lawmna inkhawm hi an kohhran ipa min, Upa F Lallura’n a kaihruai a, jubilee thupui, ‘Malsawmna ni tura koh’ tih chu an kohhran chairman, Pastor Zothansanga hnen atangin an ngaithla a, Jubilee Zaipawlpui an zai a, tlaiah ruai an theh a, Synod Hospital-a damlo, a awmpuitu leh thawktu mi 500 chuangte an ruai hi an suah a ni.
Electric Veng Kohhran hian September 3 khan an diamond jubilee hi lawm tanin kawng hrang hrangin jubilee lawmna hi an buatsaih a, jubilee pual hian Rs. 25,72,113 sengin Calcutta Mission Field-a Raidighi Biak In, Baduipur Pastor Biala mi a saksak a, August thla khan hawn a ni a, jubilee an lawm hi September 24 zanah an khar dawn a ni.
Electric Veng Presbyterian Kohhranah hian member 3,342, dan zawhkim 2,677 an awm a, an jubilee lawm nana kuminah Ramthar Field-a ringthar 60 neih tlin tuma hma an laknaah Pathian khawngaihna changin ringthar 159 an nei a. An kohhran mi Pastor pahnih an awm a, missionary-a chhuak mi 14 an awm.