Aizawl: Mara District Congress Committee chuan nimin khan Laila Hall-ah special conference an hmang a, Congress President Lalsawta’n Mizote sakhua Kristian chhanhim chu mutmawh hnarmawhah neih a ngai tih a sawi.
Lalsawta chuan Kristian sakhaw nuai bo tumtu BJP an thawhpui dawn lo tih an sawi hnua thawhpui leh zel MNF party te, BJP thawhpui tur leh tur loh pawh chiang lo, thiana siam tuma BJP Mizorama an len theihna tura kawng sialtu tualto party, ZPM-te chu ram, hnam leh sakhuana atan a him dawn lo a, innghah ngamna an ni lo tih a sawi a, “Mizoramin tuna a mamawh ber chu Pathian a ni a, Pathian leh ram dah hmasa ngam hruaitu kan mamawh,” a ti.
He huna thusawitu dang, Zodintluanga, MLA leh CLP leader ni bawk chuan MNF sorkar chu an thutiam hlen lo-ah puhin Rs. nuai 3 sem tumin Rs. 25,000 an sem ve nial nual a, a thuin lei an verh a, a thuin kawngchhawng an siam a, a thuin Assam Rifles an sawn chhuak tih a sawi a, “A tirin thu a awm, thu chu chief minister-in a sawi. A taka tih hmuh tur awm si lo,” a ti.
MDCC Special Conference-ah hian MDC bye-election neih tura Siaha East I constituency Congress party candidate atan F. Lallawmawma puan niin MLA inthlan lo awm tura Palak biala ding turin I.P Junior puan a ni a. Lawngtlai West bialtu MLA C. Ngunlianchunga’n thu a sawi bawk a ni.