Aizawl: Mizorama health centre 300 chuanga solar energy hmanga kawlphetha pechhuak tura hmalakna, Energy for Health program Mizoram chu nimin khan Health & Family Welfare Minister Dr.R.Lalthangliana’n a hawng.
Health Minister Dr. R. Lalthangliana chuan kumin ral hma ngeia Mizorama Health Centre 300 chuangah ni zung chakna hmanga hnathawhna atana an mamawh power pechhuak tura hma an la tur chu lawmawm a tih thu sawiin, he Energy for Health hmalakna hi PHC leh sub centre hrang hrang, kawlphetha hmuh that loh avanga buai chang tawk thinte tan thu lawmawm tak a nih thu leh tun lai khawvelah lungalhthei, tuialhthei atanga kawlphetha siam chhuah kalsan telh telha nizung, lui luang chakna hmanga kawlphetha siamchhuah uar deuh deuh a pawimawhzia a sawi.
VK Joby, CFO -SELCO Foundation chuan, “Health dept leh SELCO Foundation te ram hmasawnna kawnga kan thawkho thei tur hi a lawmawm hle a; ‘Energy for Health’ program hi hriselna kawnga Mizorama hmasawnna thlentu a nih theihna tura a tha thei ang bera duan leh buatsaih a ni,” a ti.
‘Energy for Health’ hian Mizorama PHC zawng zawng leh sub-centre thenkhat a tuam ang a. PHC pakhat atana sum hman tur hi Rs. nuai 7 atanga nuai 8 niin sub center pakhat solarise-na tur chu Rs. nuai 3 atanga nuai 4 ni tura ruahman a ni a. He project atan hian SELCO Foundation, Mizoram leh Health & Family Welfare Department chuan Memorandum of Understanding (MoU), thawhhona thuthlung an ziak a ni.
He programme hawnnaah hian Mission Director, NHM Health Dept. a, mi pawimawh tak tak te, SELCO foundation atangin Chief Finance Officer leh a staff te leh khawtlang hruaitute an tel a ni.