Season liamta a UEFA Champions League final khel Inter Milan in an beisei loh dan deuhin kumin group stage bul an tan a, 1-1 in Real Sociedad nen an inhnehtawk.
San Sebastian a Reale Arena a inkhelah hian Inter defender Alessandro Bastoni chuan inkhel tan tirah tihsual neiin ball a hloh a, minute li-na lekah midfielder Brais Mendez chuan goal khungin La Real in hma an hruai.
Mikhual team in an si phurh sut tum mahse Basque team inkhelah an chungnung zawk a, ball thunun zawkin goal hlauhawm pawh an ngah zawk.
Kum 10 chuang hnua Champions League group stage an khelh leh hmasak berah goal khung nual teuh hle in Robin Le Normand chuan huntha a neihah a tauh goal lova, Spanish midfielder mikel Oyarzabal goal khung tur chu Inter goalkeeper thar Yann Sommer chuan a save sak tha hle.
Second half-ah referee Michael Oliver chuan Inter midfielder Nicolo Barella chu red card pe hman mahse video assistant referee hmanga endik hnuah a thutlukna a sut leh.
Barella hian Mendez chu a rap lui nia a lan avangin red card pek a ni a, mahse Oliver hian khelmual sirah ennawnin a thutlukna a sut.
Lehlamah Inter zawkin huntawp hma in an beidawn duh loh rah an seng a, tunlaia midfielder che tha Davide Fratessi cross chu Lautaro Martinez-a’n minute 87-naah ti goal in an si phurh an sut.
La Real coach Imanol Alguacil chuan, “Ka naute an khelhthat em avangin ka lawmpui hle. Kei leh fans te chauh ni lovin player te pawh kan inkhelh dan avang khan hmai uang takin kan awm thei.” tiin a sawi.
Inter coach Simone Inzaghi chuan, “Team tha kan hmachhawn tih kan inhria a, kan kheltha lo chungin point kan hmu thei kha a tha a, kan goalkeeper vang a ni pakhat.” a ti ve bawk.
Inkhel dangah Benfica in RB Salzburg an mikhual a, an defender Antonio Silva chu minute 13-naah red card pek a nih an tuar a. Roko Simic penalty khung leh second half a Oscar Gloukh te goal khung avangin Estádio da Luz-ah mikhual team Salzburg an chak.