Mizoram infiamna huangchhunga inelna hautak berte zinga mi, kawng thui zawha thirsakawr intlansiak Tour de Hmuifang vawi 3 na chu Inrinni hian Aizawl atanga Hmuifang tlang thleng tlan a ni leh dawn.
Mizoram sorkar a Tourism Department leh Mizoram Cycling Association (MiCA) tangkawpin an buatsaih Tour de Hmuifang-ah hian inelna chi hrang panga a awm dawn a; Junior, Elite, Master leh Road (Open) category bakah a vawikhat nan Women tan inelna hran buatsaih a ni dawn bawk. Tun thleng hian thirsakawr khalhmi 63 in hming an pe lut tawh.
Inrinni zing dar 6:45 ah Sports Minister Robert Romawia Royte chuan Tour de Hmuifang intlansiaka tel tur hi Aizawl Vanapa Hall kawt atangin a vailiam anga, chawhnu lam dar 2-ah Hmuifang Tlang ah a kharna hun buatsaih a ni leh dawn.
Mizo thirsakawr khalhmi te hian India Hmarchhak huap inelnaah lawmman an lo dawng fo tawh a, India ram hmun danga intlansiak rothap, hnamdang ramdang mite nena inelna, Himalaya tlang pang per hmun hlauhawm tak taka intlansiaknaah te pawh an lo tel tawh.
Tour de Hmuifang ah hian Mizoram Cycling Association chuan Aizawl Municipal Corporation, PM-JAY (Pradhan Mantri Jan Arogya Yojona) leh Ministry of Tourism, GOI, North Eastern Reasonal Office, Guwahati te a thawhpui dawn bawk a ni.