Manchester United in European football a team tha berte elpha turin an tan kawng a la thui tih lantir nan Bayern Munich in 4-3 in an hneh.
Allianz Arena-ah Nilaini zanah German champion leh English club-te an inkhel a. United in inkhel hun thenkhatah fakawm taka khelhlai nei mahse tihsual an neihte a pawi thui thin, team pahnih inkar tizautu a ni.
English club in bul an tan tha zawk a, ball inpe kual tha zawkin hlauhawm siam tam zawk an ni hmasa. Amaherawhchu minute 28-naah United goalkeeper Andre Onana a chesual. Leroy Sane-a’n Harry Kane-a ball pek chu chawp leh chilh a pet nghal thutin a dan hman tur a dang lo.
Bayern goal khungin inkhel a tidanglam a, United an tlahniam. Minute li hnuah Jamal Musiala chuan United tlarhnung hnehsawh taka thiatin Serge Gnabry-a’n an goal hnihna a khung.
United striker Rasmus Hojlund chuan second half-ah United tan goal khat a khung a. Mahse Christian Eriksen penalty chawi atangin Harry Kane chuan an goal thumna a khung.
Huntawp dawnah United tan Casemiro chuan goal khat khungin beisei an nei a, mahse a hma ang thovin tlarhnung inthlahdah avangin Mathys Tel chuan Bayern goal li na a khung a. Huntawp hma in Casemiro bawkin an goal thumna a khung ve leh a ni.
United goalkeeper Andre Onana chuan inkhel zawhah mawhphurhna a la ngam a. Interview hmachhawn dilin, “Chak tur kan ni a, keimah vanga chak lo kan ni.” a ti.
“Hei hi goalkeeper nun a tel ve a ni. A awlsam lo. Bul kan tan tha a, ka tihsual hnuah erawh inkhel kan thunun chhunzawm lo. Ka tihsual avangin kan team pumin kan tuar.” tiin a sawi.
Europe-ah Gunners an kir
Arsenal in kum ruk hnua a vawikhat nan UEFA Champions League an khel a. An mikhual PSV Eindhoven chu 4-0 in an sawp.
Emirates Stadium a Group B a inkhelah hian Gunners in Bukayo Saka hmangin goal hmahruai an khung a. English winger in Leandro Trossard goal khung tur siamsak bawkin halftime hma in striker Gabriel Jesus chuan an goal thumna a khung.
Mikel Arteta in tun kartawp a North London derby khelh tur thlirlawkin team a thlak kual a, second half-ah Gunners captain Martin Odegaard chuan goal mawi a khung leh hman tho.
Arsenal boss Mikel Arteta chuan, “Nuam ti takin kan inkhel a, kan boruak tawn nuam kan ti tlang. A tir atangin chak tumin kan bei a, tlarhmaah leh goal ven lamah kan tha hle ve ve. Champions League-ah goal goal nawr leh goal venah kan chetthat ve ve chuan beiseina sang hi a neih ngam thin.” tiin inkhel zawhah a sawi.
Group C lamah Real Madrid tan Jude Bellingham chu an fachuam thar a ni a, team chakpuitu ni lehin Union Berlin lakah chakna goal a khung.
English midfielder hian tun season a a goal rukna khungin 1-0 in Real Madrid hian hnehna an chang.