Zirchianna thar ber atanga a lan danin ei leh in dik tak ei te, mumal taka taksa insawizawina neihte hi ‘Damreina thuruk’ a ni a. The British Nutrition Foundations Healthy Ageing- chuan mit, thluak leh ruh te mai bakah taksa peng hrang hrangte venhimna atana thil pawimawh leh tangkai tak takte an tarlang nghal.
Vitamin B12 tamna- Sangha, Artui, Bawnghnute leh Omega 3 awmna te hian thluak a tichakin a tihrisel hle tih a ni. Calcium pai tamna – Bawnghnute leh Cheese te hian ruh an tikhawng a, Osteoporosis vei theihna lak atangin a chhanhim thei. Tin, Vitamin D hi Ni eng atanga dawn theih niin ruh leh tihrawl te hian an mamawh hle.
Lung hrisel nei tur chuan Omega 3, Fibre, folate, vitamin B12 leh potassium te hi an pawimawh em em a. Thlai hnah thlai rah tharlam tak tak te leh beans-ahte hian hengte hi hmuh theih a ni. Mit hrisel tak nei tur chuan Grape, spinach leh broccoli te hi ei ngei ngei tur a ni bawk.
Tin, taksa chetna chi hrang hrang- Ke-a kal, lam leh huan siam te hian lung natna a tikiam nghal thei a, cancer leh zunthlum te pawh a umkiang thei niin he report hian a tarlang.