Aizawl: Tun kar Thawhtanni atanga tan, Mizoram Police Sports Meet chu nimin khan Mualpuia Rajiv Gandhi Stadium-ah khar a ni.
Police Sports Meet khartu, Home minister Lalchamliana chuan infiamna hian taksa hriselna mai bakah police-te inkarah inunauna, inhmelhriatna tha, inlaichinna tha, inhriatthiamna leh thawhhona tha a thlen tih sawiin, sports chu neih zel a nih theih nan duhsakna a hlan.
Home minister chuan hripui leng avanga sorkar sum dinhmun chhiat avangin recruitment tih hleihtheih a ni lo chu pawi a tih thu a sawi a, chutichung chuan tuna composonate ground-a lut mi eng emaw zat police training centre-ah an training mek tih a sawi.
Khuallian chuan, “All India level-ah infiamna hrang hrangah a langsar pawl in ni hi a lawmawm takzet a, 71st BN Mullick Memorial Football Championship, Srinagar-ah pawh Mizoram Police team-te in-champion thei hi ka chhuang takzet che u a ni,” a ti a. Mahni chauha awm lai pawhin mahni invawng thaa discipline tha tak nei reng turin kalkhawmte a chah a ni.
Mizoram Police infiammite intawhkhawm 2023 hi September 18 khan tan niin contingent 12-a inthenin sports discipline hrang hrang – football, volleyball, basketball, badminton, tug of war, tennis, table tennis, boxing, judo, shooting, chess, carrom, chinese checker, taekwondo, leh athletics-ah an inel a ni.
Gold medal 18 lain overall champion chu Central Range Contingent-te an ni a, pahnihna chu PHQ Group niin pathumna chu Red Group te an ni.
XXI Mizoram Police Sports Meet 2023 theme chu ‘Unity Through Sports’ (Inpumkhatna Tura Infiamna) tih a ni a, infiammi 1,107 an tel a ni.