Aizawl: Rs nuai 262 senga sak, Champhai District Transport Office Building thar chu nimin khan Transport Minister TJ Lalnuntluanga’n a hawng.
Nimina hawn tak Champhai District Transport Office Building thar hi July, 2022 khan sak tan a ni a, a sak zawh hun atan January, 2024 ruat ni mah se hun tiam thlen hma thla thum velah sak zawh hman a ni.
Building hi contractor HS Lalfakzuala’n a sa a, a basement sq. m 186.54-a zaua sak a ni a, a hnuai ground floor hi sq. m 206-a zaua sak a ni.
Champhai DTO building thar hawngtu TJ Lalnuntluanga chuan Champhai District ah Transport Department Office Building tha tak sak a nih theihna tura hmala tu zawng zawngte chungah lawm thu a sawi.
Transport department hmalakna sawi chhunzawmin public transport a chuang zinga nunau chak lo zawkte chungah hleilenna a thlen lohna tur leh an lo him theihna turin lirtheiah panic button dah a nih tur thu sawiin, lirthei chhiah a hun a pe thei lote tan a pung awm lovin tum hnih kalpui a nih tawh thu leh tunah pawh December 31 thleng a pung awm lovin lirthei thi tawh tihnunna hun hawn a nih mek thute a sawi.
Lirthei dah tawl mai mai tawh te, chhiah pek theih tawh si loh thenfai hna pawh thawh mek niin engemaw chen chinfel a ni tawh tih a sawi a, E- Chalan System pawh kalpui mek a nih thu bawk a ni.
Building thar hawnna inkhawm Transport Director T. Lalrammawia kaihhruai ah hian khualzahawm Health & Family Welfare Board Vice Chairman Dr. ZR Thiamsanga, MLA pawhin thu a sawi bawk a ni.