Aizawl: Hmeichhiate venhim leh an dinhmun chawi kan kawnga hnathawk tha chawimawina, Zakapa Award, 2023 chu Dr. Lalrinawmi Ralte, Tlangnuam hnenah hlan a ni.
Social welfare department buatsaihin nimin khan Vanapa Hall-ah Zakapa Award 2023 semna hun hman a ni a, khuallian, Chief Minister Zoramthanga chuan Lal Zakapa’n a ram leh a hnam a hmangaihna avang leh a hnam dan a dinpui avangin dan lo angin sorkar hotulu, bawrhsapte pawh a hnial ngam a, Mizo hmeichhiate chhan nan engkim chân a huam tih a sawi a, a huaisenna chu Zofaten an hriat renga huaisen taka a hnung an zui a tul tih sawiin, thangtharte pawhin hnam chhan turin theihtawp chhuah zel a tul hle tih a sawi.
Chief minister chuan ram hrang hranga awm Zohnahthlakte tawrhna chungchang sawiin, “Kan chhehvela kan Zohnahthlak unauten ‘chhanchhuah kan ngai e’ tiin min au mek a. Mizoram lam rawn hawiin an rawn pan khawm a. Anni lo tuamhlawmin kohhran, tlawmngai pawl leh mi tin maiin theihtawp kan chhuahho a ni,” a ti a, “He tanhona, ram leh hnam hmangaihna hnathawh ropui tak avang hian sorkar laipui pawh min pui turin a inhawng deuh deuh zel,” a ti bawk.
Zakapa Award, 2023 hi Dr. Lalrinawmi Ralte, Tlangnuam hnenah hlan niin award hian thuziak leh pawisa fai cheng nuai 1 a keng tel a. Dr Lalrinawmi hian Mizoram pawn lama Mizo hmeichhia harsatna tawkte chhanchhuahna hna vawi tam tak a lo thawk tawh thin a ni.
Award hlanna inkhawmah hian Social Welfare Minister Er. Lalrinawma’n thu a sawi bakah Zakapa Award Organising Committee member David R. Lalsawmtluanga’n Lal Zakapa’n Mizo hmeichhiate thlavang a hauh dan chanchinte a sawi bawk.