Mahni mualah inkhel an hmachhawn a, mahni tualzawlah an khingpui Project Veng FC in an hneh. Zote Toyota Mizoram Premier League 10 round 6-ah FC Venghnuai chu 2-1 in an hneh.
Project Veng a Kolasib District Sports Stadium-ah tun season a kaithar club in season hmasa a final khel Venghnuai an hmachhawn a. Venghnuai tan Eric Remruatpuia Chhangte chuan minute hnihnaah goal a khung nghal.
Mahse Project Veng hi an tlo tih round hmasa atangin a hriat tawh. Minute 17-naah Samson Haubiakmuana’n an si phurh a sut a. Second half-ah tawp dawnah Lalfamkima chuan an chakna goal a khung zui a. Mizoram Premier League-ah a vawikhatna atan hnehna an chang.
Inkhel hmasa zawkah veng inthenawm Chhinga Veng FC leh Electric Veng FC te an inkhel a, 1-0 in Chhinga Veng FC an chak.
Table laihawl a dinhmun tha zawk nih tuma inum club pahnihte inkhela danglamna hi Ephraim Lalremtluanga’n minute 65-naah a siam a, a goal khung chu Chhinga Veng in chakpui in point khatin Electric Veng hi an tlansan.