Kar kalta khan Kolasib a auto rickshaw khalhtute chuan kolasib pess club ah chanchinbu mite kawmin an harsatna tawh mek an hrilh a. Kolasib Auto Rickshaw Drivers Union (KARDU) chuan kolasib ah a khawpui nena in phu lo khawp auto rickshaw permit sawrkarin a pe chhuak thar ani an ti a. Tuna an pek ang hi kolasib district hqrs ah hian service vek sela dinna pawh an indaih lo / inchan lo dawn ani an ti bawk. Kolasib mipui tam lam ngaihtuah pawhin tunah hian kolasibah public transport 800 zet a awm dawn a ni a ti.
Sawrkarin hetianga an party mite duhsak vang ringawta khawpui in a mamawh ang piah lama permit an pe leh mai thin hi mipui tan a tha ber em tih chu ngaihtuah chian a ngai hle mai. KARDU te hian midang permit neia an service ve chu huphurhin an ngaimawh ve hrim hrim niin a lang lova. An service na tur khawpui dinhmun, kalkawng an neih zat te, an khawpui mihring awm zat te, autorickshaw awm tawh sa zat te ngaihtuahin an eizawnnaah auto nei leh nei an in tamchhuah thei tih an hmu chiang a. Chuvanga sawrkar in permit a pekchhuah belh hi ngaimawh an ni ber a. Sawrkar thu a ni a, KARDU hian thuneihna chu an nei hauh lo. Mahse, mitin hian kan eizawnna chungchangah hi chuan sawi tur kan nei a. Democracy ram kan nih angin kan ngaihdan kan sawi a thiang a. Tha an tih loh chu an auchhuahpui ve a ni. He thil hi sawrkar lai mnf party miten lam tang siam tamna atana an hmanrua pawh niin a lang tel bawk.
Khawi ramah pawh hian mipui tana eizawnna mumal ruahman hi sawrkar mawh a ni a. A ram mipui mamawh dan ang, an eizawnna mamawh tawk anga heng sawrkar control permit te hi pek chhuah thin a ni a. Kan ramah hian kan kalphung fuh loh avangin sawrkar control thil reng remgah hian thil tha ngei tur hi tha loah kam siam tam tawh khawp mai. Engkim mai hi party politics leh hleih neihna in ka thlir a. Aizawl khawpuiah ngei pawh hian taxi permit pekchhuah a tam em em a. Tuna taxi neitute pawh hian permit thar pekchhuah an huphurh tawh a. Taxi a eizawngte hian hmasawn pui aiin ei tawk tawkin hna an thawk a. An eizawnna chu a hlawk loh avangin an motor a lo hlui chuan a thar lei lehna khawlkhawm tham nei ta lo chuan permit nen a hlui an hralh a. Eizawnna mumal nei zui lo bawkin an awm phah fer fur tawh a. Kan party mite tan kan pe ve duh alawm tihte hi minister tawngkam a la ni fo thin. Heng hian ram hmasawnna lamah min hruai lova. Vote hmuh nan hmang mahsela econmic tarmit atang chuan thil tha lo tawpkhawk a ni. Uluk taka ngaihtuah a, eizawnna lo nei sa tawhte tichhe kher lova mipui eizawnna.siam hi sawrkar hmalakna tur zawk a nih laia a awmsa leh a awm thar turte tana tha lo ve ve siamchhuak thiam hi chu ram hmasawnna kawngah a fail chiang hle a ni. Kan sawrkar kal tawhte, a lo la awm zel turte hian an party mite chauh eizawnna hi an buaipui tur a ni lova, mi zawng zawng huap sawrkar an ni tih hi hre tel reng bawk sela.