India ram hmun dang rualin Mizoramah pawh August thla atang khan mit na hri, ‘conjunctivitis’ a leng a, September thla chawhnu lam a her tan hnuah erawh hri leng hi a ziaawm chho tana ngaih a ni.
Health department hotuten an sawi danin, tun hnaiah sorkar damdawi in hrang hranga eye OPD-ah mit na hri avanga inentir an tam tawh lo a, hetihlai hian mit na hri kai, damdawi in pan kher loa mahnia inenkawl pawh thahnem tak an awm tho chu an ring.
Health department hotute chuan, “Mit na hri leng hi a reh duak tawh tia sawi theih chu a ni lo a; mahse, tun hnaiah erawh hri avanga damdawi in pan chu an tam tawh lo a, damdawi dawr neitute pawhin mit na damdawi zawng an tlem chho niin an sawi a, hri kaite chu la awm tho mah se a ziaawm tan niah kan ngai,” an ti.
Tar lan tawh thin angin August thla pum leh September thla chawhma lam khan Mizoramah mitna hri kai an tam a, sorkar damdawi ina eye OPD-a inentir zinga za zela 50 vel chu mit na hri kai an ni.
Health department-in Mizoram chhunga sorkar damdawi in hrang hrang dinhmun an chhinchiah danin, September 4 atang 9 chhung khan mit na hri avanga damdawi in pan mi 1,569 an awm a, a karlehah ziaawm chhoin, September 11 atang 16 inkarah chuan mit na hri vanga damdawi in pan hi mi 1,467 an awm a ni.
Health department hotute, mit na hri len tirh khan Aizawl district-ah hri hi a leng nasa zual a, mit na hri vanga sorkar damdawi in pan pawh an thahnem fal hle a, tun hnaiah erawh Aizawlah a zia a, district dangah erawh mit na hri hi a zual chho deuh zawk nia a lan thu an sawi bawk a ni.