Parliament Budget Session chu January 31 leh April 8 inkarah neih a ni dawn a, a kar lakah thla khat dawn chawlh a awm thung ang.
Union budget chu February 1-ah pharh a ni ang a, hemi ni hian president-in rorelna in hniha member-te hmaa thu a sawi bawk ang.
Hripui a len mek laiin session neih tur hi puan a ni a. State lian tak tak pangaa assembly inthlan bawrah neih a ni bawk ang.
Parliament session hnuhnung panga chu hri leng avang hian mumala neih a lo ni lo tawh.
Thuneitute chuan Rajya Sabha leh Lok Sabha thut dan tur hi duhthlan theih turin an duang a, thutna pawh member-te inhlat taka an awm theihna turin ruahman a ni tih a sawi.
“Duhthlan tur kan siam a; mahse, thutlukna chu tun thla tawpa Covid-19 kan dinhmun azir a ni ang. Lok Sabha speaker leh Rajya Sabha chairman chu January 25/26 velah session kalpui dan tur sawiin an inhmu ang,” tiin thuneitu sang pahatin a sawi.
Member leh thawktu zinga hri kai an tama session chawlhsan a nih dawn leh dawn loh thu erawh a sawi lang tel lo thung.