MPL champion lai Chawnpui FC in an lallukhum humhim turin ke an pen chhunzawm a. Team tha ve ve, coach tha pahnih thluak inbeihnaah 2-1 in Chhinga Veng FC an hneh.
Thawhlehni chawhnu a 1st Bn. MAP Ground a inkhelah hian Chhinga Veng FC in goal an khung hmasa a. Minute 18-naah MS Dawngliana’n goal a khung.
Chawnpui in an si phurh an sut thei lova, mahse hlauhawm erawh an siam ve fo. Second half tan tirah an beiseina ti sang sawt turin Joseph Lalmuanawma’n goal a khung a. 1-1 in an inhnehtawk.
Point khat insem tur nia an lan tawh hnuah Lalbiakzuala hmangin Chawnpui FC in minute 91-naah chakna goal an khung.
Inkhel hmasa zawkah Mizoram Police in an mamawh hnehna an chang a, a sang pali zingah an dinhmun an sawhnghet.
Police tan F Lallawmkima, Lalhmunmawia leh Lalnunsanga ten goal an khung a. Huntawp hma in FC Venghnuai tan RM Zothansanga chuan goal khat a khung.
Venghnuai hi round sarih hnuah point khat chiah la hmu an ni a, season tharah MPL khel tura inhamtang turin an dinhmun siamthat nan hun tam an nei tawh lo.