MNF sorkar term kal lai mek atana council of minister te thukhawm hnuhnung ber tawh tura ngaih chu nimin khan neih a ni a, sikul 263 chu an dinhmun mek aia tha zawka hlan kai a rem ti a, Mizoram Journalists Pension Scheme a pawm.
Chief Minister Zoramthanga hoa thutkhawmah hian thurel tura chhawp chhuah 8 awmin, a tam zawk chu pawm a ni a. An thu pawm zingah hian sikul hrang hrang an dinhmun mek atanga dinhmun tha zawka hlan kaina tur ‘Proposal for upgradation of category of school’ telin, sikul 263 chu an dinhmun mek aia tha zawka hlan kai rem ti a ni.
Heng bakah hian ‘The Mizoram Journalists’ Pension Scheme 2023’ te, lei hnuai leh lei chunga tuihna te humhalhna tur ‘The Mizoram Water Resources (Management & Regulation) Bill, 2023’ te pawm a ni a, Social welfare & Tribal affairs department leh Women & Child development department chu department pakhata awm tawh turin Social welafare, Tribal Affairs, Women & Child development department tih tawh tura pawm a ni.
Council of ministers thukhawm zawhah hian Cabinet minister pahnih Lalchhandama Ralte leh Lalruatkima chuan thuthar thehdarhtute kawmin, an department chan kaihhnawih thu pawm te an sawifiah a, Education minister Chhantea chuan adhoc aided-a awm mek Higher secondary school 12, High school 120 leh middle school 48, a vaia school 180 chu sorkar sikula leh provincialised turin a pawm a, october ni 1,2023 atangin dinhmun sang angah chuan awm chhoin kum 2 chhung probation angin an awm phawt anga kum 2025 atrangin sorkar sikul tak tak a ni tawh tih a sawi.
Heng bakah hian lumpsum sikul 52 chu provisional adhoc GIA-ah hlan kai a ni a, sikul 31 chu lumpsum ah dah an ni tihte sawiin, khawtlang enkawlna hnuaia zirna in hrang hrang awm mek lumpsum te pawh grant an dawn thin tih pun a ni a, sikul upgrade thar leh grant tih pun chu a vaiin sikul 341 a nih thu leh a nghawng tur khua leh veng chu 268 a nih thu a sawi a ni.
I&PR minister Ruatkima chuan, The Mizoram Journalists’ Pension Scheme 2023 chungchang sawifiahin, he scheme hnuaiah hian chanchinbu mi leh thutharthehdarhtu, MJA member ni bawk kum 60 tling tawh leh chanchinbu leh thuthar thehdarhna kawnga chum lo chat lova kum 30 lo thawk te he hamthatna hi an dil thei dawn a, thla tin cheng 8500 pension ang tanpuina sum an dawng thei dawn tih a sawi a, family pension angin chhawm emaw, a latu in a boralin an nupui fanau ten an la thei dawn lo tih a sawi.
Ruatkima chuan an thutkhawmnaah hian sorkar laipuiin Myanmar leh Bangladesh raltlante biometric leh biographic ti tura na taka Mizoram sorkar a rawn nawr chungchang an sawi ho tih sawiin, Mizoram a awm mek raltlante hi enhranna awm thei tur anga lo chhinchhiah bik chu an duh lo a, biometric leh biographic lak chu Mizoram sorkarin a tih theih rih loh thu sorkar laipuiah thlen an rel thu a sawi bawk a ni.
I&PR minister chuan, MNF kaihhruai sorkar chu Covid 19 hri leng karah tluang taka a kal thu sawiin, tun term kal mekah chuan vawiina an thutkhawm chu a tawpna ni tawh tura an ngaih thu a sawi rualin, ram mipuiin sorkar an thlawpnaah an lawm tak zet tih a sawi bawk a ni.