Barcelona in vawi hnih si an phurh an sut a ngai a. Mallorca nen inhmachhawnin point an hloh a, 2-2 in an inhnehtawk.
Thawhlehni zana La Liga inkhelah hian champion lai in tlawm lova season bul an tan chu an chhunzawm a, mahse point an hloh vawi hnihna a nih avangin lehpelh theih an ni.
Estadi Mallorca Son Moix a inkhelah hian Barcelona in penalty an hmuh nia lang chu video assistant referee hmanga sut ni lo se chakna goal khung thei an ni.
Mahni mualah Mallorca in thapui nen Barca an lo hmuak a. Inkhel tan atang tlan taima zawk niin Barcelona inkhel tur chu hneh takin an ti buai.
Minute 8-naah an tum ti hlawhtlingin Barcelona goalkeeper Marc-Andre ter Stegen ball petchhuah tha tawk lo chu Vedat Muriqi chuan remchangah la in goal a khung.
Goal an chhuah hnuah team tha zawk an nihna Barca in an lantir thei, mahse an tan thil a awlsam bik lo.
Minute 41-naah Raphinha chuan goal mawi a khung a. An si phurh a sut.
Barca lawm erawh a rei lo, halftime hma in Abdon Prats hmangin Mallorca in goal an khung a. An goalkeeper Predrag Rajkovic ball pek chhuah tha tak chu Muriqi-a’n tauh tla in Barca inrin hma in an tlarhnung an su tlang.
Second half-ah erawh Mallorca inkhel a tlahniam a, minute 75-naah substitute Fermin Lopez chuan Barca si phurh a sut.
“Kan buaina ber chu tlarhnung a tihsual kan neihte kha a ni. Khang tihsual ho tak tak kha thleng tur a ni lova, hetiang inkhel boruak sang leh inthlau lovah chuan a hlauhawm thin.” tiin Barcelona coach Xavi Hernandez chuan an inkhelh zawhah a sawi.
Inkhel dangah Sevilla in hmasawn lam an pan a, Youssef En-Nesyri, Dodi Lukébakio, Suso, Erik Lamela leh Enrique Salas te hmanga goal khungin Almeria 5-1 in an hneh.