Aizawl : Jal Jeevan Mission hnuaia cheng nuai 320 senga siam Vangtlang Water Supply Scheme chu nimin khan Deputy Chief Minister Tawnluia’n a hawng.
Vangtlang Water Supply Scheme JJM 2021-2024 hnuaiah cheng nuai 320 senga siam niin, november ni 9, 2022 khan hna thawh tan niin, zawh hun tura ruat November ni 9, 2023 hmain peihfel a ni a. HS Construction ten Solar Pumping siam hna hi an thawk a; Sihpui Lui tui ni zung chakna hmanga lak niin nitin tui litre 37,000 pump chhuak thei tur a duan a ni.
Sihpui lui atanga khawchhunga tui dahkhawlna hi meter 349 a thui a ni a, mipui 700 chawm zo tura ruahman a ni a, he project hnuaiah hian khawchhungah hian tuikhuah pahnih – main reservoir litre 50,000 a lian leh service reservoir 16,000 siam a ni a, hei bakah hian Vangtlang tui lakna thin ‘Kawlkhuma Kai’ thawm that (repair) tel a ni.
Vangtlang Water Supply Scheme bakah hian Vangtlang Community Hall hawnna neih nghal a ni a, Vangtlang Branch YMA leh school hrang hrang ten hnam lam chi hrang hrang an entir bakah MUP aiawh hnen atangin Hlado chham ngaihthlak a ni.
A hawngtu Tawnluia chuan, Vangtlang khua chuan hun lawmawm tak a tawng mek a, hmasawnna an hmuh thenkhat – in tina tui pek te, Community Hall thawmthat te leh Vangtlang High School Lumpsum Category C-a hlankai an nih thu te a sawi a, Vangtlang atanga Tuipui lui inkar kawng laihna tur cheng nuai 10 bakah Vangtlang Community Hall cheithatna tur cheng nuai 5 sanction hmuh thuai a beiseiawm tih a sawi bawk.
Khawzawl Addl. DC Lalfakzuala pawhin thu sawiin, Vangtlang khua chu khaw hlun tak Lushai Hills Bawrhsap pathumna AW Davies-a’n 1893-94 annual report-a a thailan tawh an nih thu a sawi a; vangtlang khua chu ziak leh chhiar thiam tamna an nih mai bakah faina lama entawn tlak khua an ni chu fakawm a tih thu a sawi bawk a ni.