Khawvel hmundang rualin nimin khan Mizoram district hrang hrangah World Rabies Day 2023 chu hman a ni.
Kumin world Rabies Day thupui chu All for One, One Health for All tih a ni a, Mizorama a hmanna pui ber Aizawlah chuan Veterinary Polyclinic Hospital, Khatlaah hman a ni a. He hunah hian Dr C. Lalrintluanga, Addl Director (VS&PH) chuan World Rabies Day hman tan dan leh hman chhan te a sawi a. Rabies hi natna hlauhawm tak, mihring pawhin a kan kai theih, a kai te zaa 99 thih theihna a nih avangin, tihdam aiin a venna hi a pawimawh zawk thu a sawi.
Dr C Lalrintluanga chuan, kum 2022 khan India ramah mihring sing telin rabies hri hi an kai a, mi 230 laiin an thihpui a. Goa state chauh hi Rabies free state a puan anih thu leh, kum 2030 ah chuan India hi Rabies free a puan tum anih avangin, chumi tur chuan National Action plan te siam ani a, chak takin Department lamin hma a la mek tih sawiin, “Rabies laka kan him hi mipuite kan chan vo pawimawh tak a ni,” a ti.
India ram hi rabies hri (ui à hri) in a chenchilh ram anih thute, khawvela rabies hri kai za zela 36 vel te chu ui seh vang anih avangin, ui leh Zawhte te tan Antirabies vaccine hmanga chiu a pawimawh thu a sawi bawk.
World Rabies Day hi kum 2007 atang khan khawvel hmun hrang hrangah hman tan a lo ni tawh a. He ni hi khawvelina Rabies hri do nan a bul tanna niin, Rabies chungchang mipuiin an hriatna leh a hri darh zel tur ven nan a tan ho a pawimawh zia inzirtirnana hman thin a ni a. A bul tum tute chu Global Alliance for Rabies control (GARC)te anni a, a hnuah World Health Organisation (WHO) hriatpuina in kum tin September 28-ah hman thin a ni ta a ni. Kuminah chuan World Rabies Day denchhen hian District hrang hrangah Rabies awareness programme leh AntiRabies Vaccine (ARV) a thlawn in ui leh randangah te pek a ni.