Kum danga kan inthlan hun pangngai November thlaah kan inthlang leh turah han ngai phawt ila. Mitinin chu chu kan tin deuh thup pawh niin a lang thei e. Thlasik khua, la vawt lutuk silo hnuaiah, boruak nuam leh thengthaw ah kan inthlang leh dawn a. Party workers leh politics atchilhtute chuan krismas aiin nuam an ti leh ngei dawn. Tun apangin krismas urlawk hauh lovin inthlan kan urlawk tluk tluk mai a. A hlimawm zawnga ngaihtuah chuan a nuam ngei ang.
Kan tana hun pawimawh em em, kan chhungkua mai nilo, kan ram hun lo la kal tur tam tak hriltu tur inthlan kan urlawk nasa viau hi a lawmawm e.
Amaherawhchu chuti khawpa pawimawh si kan urlawk dan hi ngaihtuah chian chet chetba va tha em. Tlangval hawklakin krismas pawimawhna lam ngaihtuah hauh lova engtinnge krismas hunah zu man ka neih theih ang. Engtinnge ka lo inpuahchah ang tih lam an ngaihtuah daih thin te hi kan ang riau in a lang. Kan ram hmalam innghahna, kum nga ngawt mai kan awm dan tura kan inpuahchah dan hi i thlir chiang lawk ang.
Kan rama mawhphurhna la tu tur kan political party hruaitute leh anmahni thlawptute lah chuan engtinnge midang ka sawisel ang a, vote an hmuh tur chu mipui thinlungah ka chhuhsak ang tih chauh an ngaihtuah ni mai hian a lang a. Kum nga chhunga kan ram kaihhruai an tum dan aiin a behbawmah min luh pui an tum ngar ngar a. Kan state sum leh pai dinhmun tluchhe nasa tawh lutuk chu engtinnge kan repair ang? Neihkeh cheta che a, a thei apiangin sawrkar sum sawhhek tum ringawt mai sawrkar kan din leh dawn em? Duhsak zawng siam len tum ringawt sawrkar kan siam leh dawn em? Kan sum dinhmun tlachhia siamtha tur hian inrenchemna (austerity measure) lam hawi kan tum em? Ngei ngeia kan pek ngai sawrkar hnathawk hlawhte hi a hun taka pe thei turin eng ang ruahmanna nge kan political party te hian an neih? Nge puk tur zawng chawp leh ringawt sawrkar tur kan din dawn? Inthlan hma hian sum dinhmun chhia siamthat tum dan min han hrilh thei se vote an va chakawm dawn em!
Kan zirlaite hmakhua tur sawi awm lo lutuk te hi a beidawnthlak rum rum mai. Hmalam hun duansak awm lo, thalite hi an fing tawh a, sawrkar tha lo hi an ning tawh tih vel ringawt hi ngaihthlak a ninawm ta mah mah. Tui taka, tih tak takna nena an zirlai an zir theih nan an hmalam hun tur kawhhmuh thei party an awm em. An zir zawh huna eizawnna lama an bur luh theihna tur programme leh policy te hi hmuh tir an va tha tawh ve le.
Kuthnathawktute dinhmun hi vawikhat thlai thar in leisak ngawt nilo, eizawnna ngial nghet an neih theihna tur ruahmanna (sustainable development programme) min han hlui se kan ti takzet. Kan ti ang kan tih chu kan ti thin tih ngawt a, mahse eizawn dan mumal in siamsak siloah bawk em ni kan chhuah leh ang. Huai taka kan dinhmun chhiatzia hria a, chumi atanga kan chhuah ngei ngeina tur mipui riltamna chhawk kumhlun tur ruahmanna chu kan va hmu chak em!
Kan zohnahthlak puite kan state chhehvel a awm ho chungchangah eng policy nge kan neih dawn le?. Vawiin ni a temporary shelter inpek ngawt ang nilo Insuihkhawmna tak tak hawi policy tlangzarh ngam political party kan mamawh ta e. Kan state pawn lama kan unaute pawhin an pawmpui, an rilru an nghah thlap theihna tur policy min han hlui thei party policy han duang chhuak rup thei hruaitu kan dap mek a ni.
Hawh teh u, kan inthlan tur kan urlawk dan hi a luhrum atangin i ngaihtuah nawn leh teh ang u. Naupangin krismas dawna kawrthar an lei tur ringawt an buaipui te pawh kan ang lek lek thin. Ram pumin kan buaipui tham, patlingin tapchhak zawla an sawiho laih laih tur hmasawnna leh ram leh hnam inpumkhatna han tlangzarh suau suau teh se.