Mizoram sawrkar Pu Zoramthanga chief minister kaihhruai cabinet meeting dt 27. 9. 2023 khan chief minister office ah meeting neiin an thu rel engemawzat zingah mizoram hmun hrang hranga school 180 ngawt mai chu sawrkar enkawl turin an pawm rup mai a. He cabinet thurel hi school tam taka thawktute, khawtlang hruaitute leh school naupang tan thu lawmawm tak ni tur a ni. Media lamah pawh thingtlang khaw engemaw zat chuan lawmthu an sawi mek bawk.
Amaherawhchu kan sawrkar cabinet rorel hi a hlawhtling thei ang em tih chu zawhna a ni ta. Nitina media hrang hranga kan hmuh kan ram sum dinhmun chauhzia kan hria a. Thlatin sawrkar hnathawkin hlawh an lak a ngai a. Sawrkar hnathawkte hlawh lak tur ngaihtuah hi kan finance deparment hna pui ber ani hial ang. Pek mai theih loh, pek mai tur awm loh avangin kan in chelh khawmuang a. Thla thar hlima hlawh lak pawh kan sawrkar hnathawk ten an beisei phak tawh lova. Hlawh an la lak ngawr ngawr hian an lawm ani ber tawh a. Sawrkar school awmsa te thuamtha turin sawrkarin sum a nei silova. A theih theihnaah te puk tur zawngin kawngka a kik kual a. Kum tam tak chhung rulh ngai tur NABARD atangin vaibelchhe tam tak a han puk leh pawp mai a. Puk chawpa school thuam thatnaah lah chuan duhsak zawngte sum peka tih lawm nan kan la hmang cheu bawk a. Media lamah Nabard sum hmanralna diklo nia sawi hmuh tur a tam em em a. Heti hi kan School enkawl dan chu a ni a. Tuna school provincialised 180 zet mai hi kan sawrkar hian a tak a thlen zo ang em tih chu zawhna ani ta. A hming maia sawrkar school din, en reng reng pawha zirna tha nilo kan va siam tam leh dawn em. Sum awm lo chunga hmalakna atan education hmanga in tihlawm kan han tum leh chu ania.
Mipuiin an thawhkhawm health care tak ngial pawh kan pe let thei lova. Kan CM in kan dah sa vek tia assembly house a a sawi pawh dawt sawiah kan ngaih phah a. Sum harsatnain mizoram hi vawiin ni ah a tlak buak laia heti zat sum hmanna tur cabinet meetingin a han pawm leh pawp mai hi a mak a. Sawrkar thar lo piang turah hian kan mawhphurhna a awm tawh dawn chuang lo ti ang maiin ro an han rel a ni a. A hrechiang ve lote bum a, harsatna sawi mam chunga sawrkar hmalakna hian ram leh mipui hi an hmangaih tak tak lo tih an tarlang chiang ni mai hian a hriat a ni.
Kan education kan sawp dan hi ngaihtuah chian chuan hmalam hun hi a huphurhawm ngawt mai. Tuna sawrkar school a kan pawm takte hian a nihna tur ang in enkawl an han phut ang a. Nawrhna, school khar, kawngzawh, hlawh lak theih loh avanga zirtirtu awm tha duh lo thlenga nghawng chhuak thei a ni a. Chutiang karah chuan engtinnge zirna tha chu kan beisei theih ang.
Kan ramah hian engkim mai hi politics nen kan suihzawm a. Sawrkar chetna hlek chu vote a chantir vek kan tum a. Tuna school pawm takte pawh hi mipui tih lawma vote a chantir kan tum vang mai a ni a. Thil a nihna dik taka kan kalpui hi a hun hle tawh mai. Rilru zawng zawnga vote ringawt ngaihtuah chung chuan thil tha hi rel chhuah a har ani ang. Chuvangin kan ram hruaitute pawh hian an thinlung hi thlakin thil tha siamchhuak turin ke han pen teh se. Heti ringawt chuan “Aw Zoram, i finna leh thiamna” kan tih hi kan thleng lawk lo ang a, dingchhuak tur hi miin min tlansan zel rih chu a ni e.