Aizawl : ZPM chuan Inrinni khan hmun hnihah street campaign an nei.
Chaltlang Peri Mual-a hun an hmanah ZPM Zonu President, AMC Corporator R Lalawmpuii chuan thu sawiin, “Mizoramin hruaitu lu ber tha tak a mamawhna a sang hle a. Chief Minister tha pakhatin ram a siam theihzia chu mi tinin kan hre theuh,” tih sawiin, hruaitu tha lo hnuaiah mi tha te’n awmzia an nei lo fo a. Mi tha, an thatna hmang tangkai turin chief minister eiru lo tura intiam ngam ZPM chuan an chhawpchhuak tih a sawi.
Inthlannaa pawimawh em em chu vote thlak a nih thu sawiin R Lalawmpuii chuan, “Kan aiawha kan thlan te hian mipui nge an ngaih pawimawh a, anmahni zawk? Kan thlanchhuah te nge hmasawn chak a, a thlangtu mipuite tih hi kan inzawh thar fo a tul hle a ni,” tiin, mipuite chu vote thlak ngai pawimawh turin a chah.
Durtlang Dawrkawna hun an hmanah ZPM General Secretary R Lalhnuna chuan thu sawiin, Mizorama ram hruaitu hmasa te khan an phak tawkah ram tan hna an lo thawk theuh tawh a, chutih laiin vawiina ram dinhmun thlir chuan mipuite duhkhawp erawh a tling zo lo a, ramin a ber a kaina zawng zawng thlir hian hmabak hi a eng lo hle a, ram siam duh rilru pu tan chuan lawmna aiin lungngaihna hian a delh rit zawk viau nia a lan thu a sawi.
Politics dikah chuan ram, hnam leh sakhua hi a him tur a ni tih sawiin R Lalhnuna chuan, “Kan rama cheng hnam dang te an piang mawlh mawlh a, kawng hrang hrangin min chimral mek a ni. Kan state thenawm han thlir ila, BJP sorkarna hnuaiah kohhran pawh a him zo ta lo a, kan ram pawh he thli hian min man ve tan mek a ni,” a ti a. Assembly house meuhah pawh dan lova thiltih chu mit siai san a nih thu te, dan pawh a nihna anga lekkawh hlei thei lovin a awm tak thu te leh sorkar kalphung mumal loh rah chu mipuiin an tel mek tih a sawi a. “Kan ram retheihna leh harsatna ata ram mipui kan insingsa mek a, kalphung thar mipui sorkar siam turin ZPM-ah an lo haw khawm mek a ni,” a ti.
ZPM Street Campaign ah hian Aizawl North I bialtu MLA, ZPM Aizawl North I candidate ni bawk Vanlalhlana pawhin a hman pui a ni.