Aizawl: Vairengte Higher Secondary School-in nimin khan Provisional Adhoc Grand In Aid-a an luh lawmna an hmang a. Serlui bialtu MLA, Lalrinsanga Ralte-in khuallian niin a hmanpui.
Bialtu MLA Lalrinsanga Ralte chuan Provisional Adhoc Grand in Aid-a hlan kai an ni chu Vairengte HSS-te a lawmpui thu a sawiin khawtlang tana phurrit tam tak awm thin chu a chhawk zangkhai ngei a rin thu a sawi a. Tun dinhmunah a tangkaina leh pawimawhnate hmu thiam lo mah se, kum nga atanga kum 10 hnuah an hmuh a beisei thu leh a rah chhuah an seng dawn chauh niin a sawi.
Serlui bialin zirna lamah hma a sawn theihna hma a lak thin thu leh MLA term khat a nih chhungin a bial chhunga zirna in hrang hrangten hmasawnna tam tak an neih thu a a sawi a. Hmasawnna chu politics dik tak a nih thu leh, politics tha leh dik a awm theihna atan theihtawp a chhuah thin thu a sawi a. A bial tana a tum ber chu MLA a nih chhunga bial hmasawnna tur atana a theihna zawng zawng seng a pen chhuah a, bial chhunga hmasawnna awm thei ang ang thlentir a nih thu a sawi bawk.
Vairengte HSS hi kum 2008 khan khawtlangin an din a. Kum 2012-ah education department atangin permission an hmu a, kum 2016-ah MBSE hnuaiah in-affiliate-in, kum 2018-ah Lumpsum-ah dah a ni a. Cabinet meeting hnuhnung bera school eng emaw zat Provisional Adhoc Grand In Aid hlan kai zingah a tel a ni.