Kum 5 dawn ngawih a chuh hnu-ah Bollywood director hriathlawh Boney Kapoor-a’n Frebruary 24, 2018-a a nupui Sridevi thih dan mak leh sawizui hlawh tak chungchang a sawichuak.
Dubai, UAE-a vanduaina thlengah Sridevi (54) hi a thlenna Hotel-a bual In-a thi-a hmuh a ni a, lemchan khawvel nasa takin a nghawrchhuak nghal a, a pasal leh film siamtu ni bawk Boney laka rinhlelhna leh tihhmingchhiat tumna thlengin a ri nasa.
Heti anga Sridevi thih chhanah hian khauh tak maia ei leh in chungchang a kalpuina nghawng fuh lo kal zel niin, Boney hian a sawi a. Thihna thlen hnu lawkah ni hnih dawn Dubai police te’n thu an zawtfiah a, an karcheh nasa hle.
The New India-in a kawmnaah Boney hian a nupui Sridevi hi ei leh in a inhrek nasa a, chawnghei pawh a nei zing hle, a ti. Chi (salt) a ei lo tawp mai chu chhiatna thlentu-ah a ngai bawk.
“Chaw a nghei zing angreng a. Lan mawi loh leh nalh loh a hlau thin hle. Pian nalh loh thlengin a hlau em em a, TV lamah thlengin lan mawi ngei ngei a duh thin. Kan inneih hnu atang khan nikhawhre lova awm zauh zauh kha a thlen thin a, vawi hnih khat mai a ni lo. A tam angreng. Doctor te’n BP hniam vang niin an sawi thin,” a ti.
He interview-ah hian Boney chuan a nupui thih hnu darkar 24 atanga 48 chhung chu police-i’n nasa mangkhengin thu an zawtfiah a ti a, hei pawh hi India media lamin Dubai police te lakah pressure nasa tak an pek vang, tih a ni bawk.
“Test hrang hrang ka paltlang a, lie detector test te chenin ka ti vek. A hnu-a report-ah chuan vanduai palh vanga thihna thleng, tih report a lo chhuak ta a ni,” tiin a sawi chhunzawm.