MNF party-in an MLA, Chalfilh bialtu Lalrinliana Sailo chu ticket an pe tawh dawn lo a, a bialah hian amah a din loh chuan MNF candidate tura ruat thar chu a tlin a ring lo tih a sawi.
Vawiinah MNF party-in bial 40-a an candidate turte an puang dawn a, nimin khan Nomination Committee chu an thukhawm leh a, an mutan, Chalfilh biala ding tur tifelin K. Lalhmangaiha Mualpui Bethel, ITI Aizawl ruat chu Chalfilhah MNF ticket-in a ding dawn.
Hemi chungchangah hian chanchinbu mi thenkhatin Lalrinliana Sailo chu a a pisa, Assembly Speaker room-ah an kawm a, Chalfilh bialah hian ding leh ta se a tlin zawh ngei a beisei tih a sawi a, hetihlai hian MNF candidate tur erawh a tlin zawh a ring lo a, “Khi lai bialah chuan pa lian deuh nih a ngai, MNF atang chuan, bakah a tlai deuh hlek tawh bawk, ka bial hi chu ka chiang ve khawp mai,” a ti.
Ticket an pe dawn lo tih chu a tan thil thar a ni lo tih sawiin, “Phut zawkna tur a ni lo,” a ti a; kum 2019 khan MNF vice president pakhatin Congress MLA bulah thusawi a lo nei tawh a, chuta tang chuan eng emaw chu a la thleng dawn tih a rin lawk sa thu a sawi.
Rina Sailo chuan candidate atana an ruat loh chhan tur awm ang a hriat loh thu sawiin, “USA ka zin tuma ka thusawi avanga ngai tawkte pawh an awm,” a ti a. Congress party-a a awm laia MNF zawm tura sawmtute kha tunah chuan amah paih duhtu an ni tiin, khang mite kha doral an chang zo ta tih a sawi rualin tun dinhmunah chuan MNF chhuahsan tumna a nei lo a; mahse, politics erawh a danglam reng avangin sawi lawk theih loh thil a tam thu a sawi.
MNF an sorkar chhunzawm a rin leh rin loh chungchang zawhna chhangin, “Kan ropui lai takin kan tla fo a, tlakpui kum a ni thei,” a ti a, hemi chungchang hi chu Pathian thu thu a ni tih a sawi bawk.