Fiorentina in Italy a league season bul an tan that chu an chhunzawm a, Cagliari lakah 3-0 in hnehna an chang.
Thawhtan zanah Stadio Artemio Franchi-ah kaithar club Cagliari in an khingpuite lakah goal an chhuah hma a. Minute thumna lekah Nicolas Gonzalez chuan goal a khung.
Argentine winger hian freekick atanga penalty area chhunga ball awm chu Cagliari lamin an pet chhuah vat loh remchangah a la.
Minute 21-naah La Viola bawkin goal an neih belh a. Mateusz Wieteska chuan an lamah ball a ti lut palh.
Second half-ah Fiorentina in inkhel an thunun chhunzawm a, huntawp dawnah M’Bala Nzola chuan an goal thumna a khung ve leh a ni.
Vincenzo Italiano pawlte hi Inter Milan laka an tlawm tih loh tun season-ah tlawm an la nei lo.
Italiano chuan, “Kan goal khung leh kan league dinhmunah ka lawm. Mahse hmasawnna tur kan la nei. Nikum aiin bul tan tha zawk mah ila player thar kan ngah a, kan inkhelhdan kan la zirho zel a ngai. Kan inman lehzual hunah chuan tun aiin beiseina sang zawk kan nei ngam ang.” tiin an chak hnuah a sawi.