Carlos Alcaraz chuan China Open khelh mekah semi-final a lut a, Casper Ruud lakah straight set in a chak.

Thawhtanni a inkhelah hian seeded number 1 nihna changtu world number two Alcaraz hian set hmasa berah 3-0 a hniam zawk ni nghalin bul a tan tha lo. Mahse insiamrem theiin a che tha zawkah a tang zui a, 6-4 6-2 in a chak.

Kum 20 mi Alcaraz hian semi-final ah hian Jannik Sinner a tum ve leh bawk a. Kum 22 mi Italian player theihna sang tak nei hian seeded number 6 Grigor Dimitrov 6-4 3-6 6-2 in a hneh.

Mipa semi-final dangah world number three Daniil Medvedev leh seeded number 8 Alexander Zverev te an inkhel ve ang.

Hmeichhe lam

World number three Coco Gauff chuan China Open a khelh hmasa berah Ekaterina Alexandrova 7-5 6-3 in a hneh.

Hmeichhe inelna round hmasa ber hi Inrinni atang khan khelh tan a ni a. Kum 19 mi US Open champion hian September thla hnua a vawikhatna atan inelna a hmachhawn leh a ni.

A zawna hnehna a chan vawi 13-na ni mekin Wimbledon first round-ah a tlak hnuin match 20 khelin vawi 19 a chak tawh a. World number 48 Petra Martic a hmachhawn leh ang.

Petra Kvitova chuan second round-ah 6-4 7-5 in Liudmila Samsonova chu a hneh lova. First round a khelh zawh hnu lawkah inkhelh tir lehnghal thuai a nih chu a sawisel zui.